Сансрын уудамд чимээгүйхэн дөхөж буй нэгэн аварга биет дэлхий, сар хоёрын ирээдүйд шинэ түүх нэмэх бололтой. Хэрвээ 2024 YR4 нэртэй астероид 2032 онд сар дээр унах юм бол хүн төрөлхтөн тэнгэрийн гайхамшигт “солирын шоу”-г гэрээсээ харж магадгүй гэдгийг шинжлэх ухаанчид анхааруулж байна.
Анх 2024 оны эхээр астрономичид энэ биетийг илрүүлээд дэлхийтэй мөргөлдөх магадлалыг 3% гэж тооцож байсан ч цаашдын судалгаагаар энэ тоо 0.0017% болж буурчээ. Гэхдээ хамгийн сонирхолтой нь — сар луу унах магадлал нь 4.3% болж огцом өссөн байна.
Судлаачдын таамаглал:
- Биеийн хэмжээ: 53-67 метр өргөн
- Магадлал: Сар руу унах – 4.3%
- Уналтын үр дагавар:
- Сарны гадаргууд 1 км диаметртэй тогоо үүснэ
- Олон сая кг хэлтэрхий сансарт тархана
- Хэлтэрхийнүүдийн зарим нь дэлхий рүү чиглэж, солирын бороо үүсгэнэ
Канадын эрдэмтэд компьютерийн загварчлал ашиглан энэ уналт хэрхэн өрнөхийг урьдчилан тооцоолсон бөгөөд уг тохиолдол нь “сүүлийн 5,000 жилийн хамгийн хүчтэй мөргөлдөөн” болох төлөвтэй гэдгийг тайланд дурджээ.
“Хэрвээ 2024 YR4 саран дээр унавал энэ нь маш их энерги ялгаруулж, томоохон цөмийн дэлбэрэлттэй дүйцэх хэмжээний нөлөө үзүүлнэ,” хэмээн Баруун Онтариогийн Их сургуулийн профессор Пол Вигерт тайлбарласан байна.
Хэлтэрхийнүүд голчлон миллиметрээс сантиметрийн хэмжээтэй байх тул дэлхийн агаар мандалд шатаж устах бөгөөд хүн төрөлхтөнд шууд аюул учруулахгүй гэжээ. Гэсэн ч зарим хэсэг нь агаар мандалд шатаагүй тохиолдолд дэлхийн тойрог замд үлдэж, хиймэл дагуул болон сансрын төхөөрөмжүүдэд заналхийлж мэдэх аж.
NASA юу хийж байна вэ?
АНУ-ын Сансар судлалын агентлаг (NASA) иймэрхүү заналхийлэлтэй биетүүдийг тогтмол хянаж байдаг. 2022 онд тэд сансрын биетийн чиглэлийг өөрчлөх “DART” нэртэй туршилтыг амжилттай хэрэгжүүлсэн. Тус хөлөг дэлхийгээс хол орших Dimorphos нэртэй астероидыг мөргөж, чиглэл нь өөрчлөгдсөн нь батлагдсан билээ.
2024 YR4 нь одоогоор дэлхийгээс хол нарны тойрог замд оршиж байгаа тул шууд ажиглах боломжгүй ч 2028 онд дэлхийд ойртон өнгөрөх үеэр эрдэмтэд нарийвчилсан судалгаа хийн, магадлалыг дахин тооцоолох төлөвтэй байна.
