“Хамгийн ойртох өдөр” ойрхон ч, бодит өөрчлөлт маш бага
3I/ATLAS нэртэй од хоорондын объект Дэлхий рүү ойртож буйтай холбоотойгоор “дурангаар амархан харагдана”, бүр “нүцгэн нүдээр ч ажиглаж болно” гэх мэдээлэл сүүлийн үед дахин тархах болов. Гэвч тооцоолол, бодит ажиглалтад тулгуурлавал ийм мэдэгдэл бодит байдалтай нийцэхгүй байна.
Одоогоор 3I/ATLAS нь Дэлхийгээс ойролцоогоор 271 сая км-ийн зайд байна. Харин албан ёсоор хамгийн их ойртох өдөр гэж тооцогдож буй 12-р сарын 19-нд энэ зай ердөө 269 сая км хүрэхээр байгаа юм. Зөрүү нь ойролцоогоор 1 хувь тул үнэндээ объект Дэлхийгээс “бараг хамгийн бага зай”-даа аль хэдийн ирсэнтэй адил нөхцөл үүсжээ. Түүнчлэн 12-р сарын 18, 19, 20-ны хоорондын зайны ялгаа дөнгөж 100 мянган км орчим байх бөгөөд энэ нь харагдах байдалд бодитоор нөлөөлөхөөр хэмжээ биш гэж үзэж байна.
Гол саад нь зай биш, гэрэлтэлт
Хүмүүсийн хүлээлтийг хамгийн их “нугалж” байгаа зүйл нь 3I/ATLAS-ийн гэрэлтэлт юм. Түүний одоогийн гэрэлтлийн хэмжээ 11–12 орчимд байгаа тул зөвхөн 120 мм-ийн нүхтэй, дээрээс нь ажиглалтын туршлагатай дурангаар л барьж харах боломжтой түвшинд тооцогдоно. Тэр ч байтугай дурангаар харлаа гээд тод биет мэт харагдахгүй, бүдэгхэн цэгийг олж ялгах шаардлагатай тул анхлан сонирхогчдод амар ажил биш.
Сүүлтэй “гайхалтай” зургууд яагаад эргэлзээ төрүүлэв?
Нийгмийн сүлжээнд тархсан “сүүл нь тод гарсан” астрофото зургууд олон хүнд найдвар төрүүлж байгаа ч тэдгээрийн ард маш их хөдөлмөр, техник оршдог гэдгийг мэргэжилтнүүд онцолж байна. Ийм зураг гаргахын тулд хэдэн зуун удаагийн экспозици хийж, дараа нь нарийн төвөгтэй дижитал боловсруулалтаар нийлүүлэх шаардлагатай болдог. Тиймээс зарим зураг бодитой эсэх дээр эргэлзээ гарч, мэргэжилтнүүдийн хувьд “хэт гоё харагдаж байна” гэсэн болгоомжлол ч нэмэгдэж байгаа аж.
Үүн дээр нэмээд Хаббл дурангаас гарсан шинэ кадрууд хүртэл нэг зүйлийг баталсан хэвээр байна: од хоорондын энэ зочин хэтэрхий бүдэг, олон нийтэд “гайхуулах” түвшинд тод биет биш хэвээр байгаа юм.
Гэхдээ байрлалыг нь тогтоож, зөв цагт хайвал боломж үлдэнэ
Харагдах нь бэрх ч гэлээ 3I/ATLAS хаана байгааг тэнгэрт баримжаалах боломж бүрэн бий. 12-р сарын 12–13-ны шөнө сар мандахаас өмнө, ойролцоогоор шөнийн 1–2 цагийн орчимд тухайн объект сарны дискнээс 10–15 градусын дээр, баруун талд байрлах төлөвтэй гэж мэдээлж байна. Өөрөөр хэлбэл зөв цаг, зөв чиглэлээ олж, хангалттай хүчин чадалтай дуран ашиглавал түүнийг “бүдгэрсэн цэг” хэлбэрээр илрүүлэх боломж онолын хувьд хэвээр.
