Google-ийн тэргүүлэх загварын ухаалаг гар утас болох Pixel 8 нь хүнд нөхцөлд гайхалтай тэсвэртэй гэдгээ харуулсан бодит явдал гарлаа. Тус төхөөрөмж 4 хоногийн турш халуун усанд байсны дараа ч бүрэн ажиллагаатай хэвээр үлдсэн нь хэрэглэгч, технологийн сонирхогчдын анхаарлыг ихээр татаж байна.
Энэхүү тохиолдол нь Польш хэрэглэгчийн хувийн амралтын үеэр болжээ. Тэрээр тавдугаар сарын баяраар Airbnb-д байрлаж байх үедээ 45°C халуун устай гидромассаж ваннд Pixel 8 утсаа санамсаргүй унагаасан байна. Согтуу байсан учир тэрээр утсаа шууд л алдсан гэж боджээ. Хэдийгээр удаа дараа хайсан ч утсаа олж чадаагүй юм.
Гэвч тав дахь өдөр нь Airbnb-ийн эзэн түүнд нэгэн богино бичлэг илгээжээ. Тус бичлэгт халуун ванны ёроолоос цэвэрлэгээний тороор Pixel 8-ыг гаргаж авсан нь бичигдсэн байв. Хамгийн гайхалтай нь уг ухаалаг утас 4 өдрийн турш халуун усанд байснаас үл хамааран гэмтээгүй байжээ.
Утсаа эргүүлэн авсан хэрэглэгч нь эхэндээ эвдэрсэн гэж таамагласан ч цахилгаанд залгаж, хэсэг хугацаанд цэнэглэсний дараа Pixel 8 бүрэн ажиллагаатай байсан байна. Тэрээр Google Pixel-ийн бат бөх чанарыг биширч, цаашид өөр брэндийн ухаалаг утас хэзээ ч худалдаж авахгүй гэдгээ илэрхийлсэн юм.
