Сүүлийн үед уншигчдын анхаарлыг татаад буй “Академия Темного Яру: 2-р жил” хэмээх хайрын романд нэгэн сонирхолтой нээлт хийгдэв. Зохиолч Лена Макдональд энэхүү бүтээлдээ хиймэл оюун ухааны тусламжтайгаар бичсэн хэсгээ устгахаа мартсанаар, ChatGPT ашигласны ул мөр нь шууд хэвлэгдэн гарчээ.
Тодруулбал, гол дүрийн баатар болон ханхүү луу хоёрын дүрслэгддэг нэгэн хэсэгт “Энэ хэсгийг Дж. Брийн хэв маягт ойртуулан дахин бичлээ — илүү хурц уур амьсгал, далд мэдрэмж, хэт байгалийн шинжтэй сэтгэлзүйн гүн рүү өнгийсөн байх ёстой” гэх техникийн тэмдэглэл бичигдсэн байв. Энэ нь зохиолч ChatGPT-д өгсөн промт буюу заавар байсныг уншигчид шууд олж харсан байна.
Тус алдаа нийтэлсний дараа хуучин хувилбарыг цахим номын дэлгүүрүүдээс даруй устгасан ч “404 Media” сайтынхан хуучин хувилбарыг олж авч, уг промт үнэхээр орсон байсан гэдгийг баталжээ. Харин шинэ хувилбарт энэ хэсэг арилсан ч, Amazon болон Goodreads дээр уншигчдын үлдээсэн скриншот бүхий сэтгэгдлүүд байсаар байна.
Уг явдлын дараа Лена Макдональд цахим орчноос бүрэн алга болж, өөрийн нэрээр холбогдох сошиал хуудас, вэбсайт, холбоо барих ямар ч мэдээлэл үлдээгүй. Зарим эх сурвалжууд түүнийг “Сиенна Паттерсон” нэрээр дахин хэвлэгдэж магадгүй гэж үзэж байна.
Энэ бол ганц тохиолдол биш. 2024 оны нэгдүгээр сард гарсан К.С. Крауны “Одержимість: Роман з Братвою та віковою різницею” романд мөн ChatGPT-гийн үг, тэмдэглэл бүхий хэсэг илэрч, зохиогч өөрийн хэлснээр файл солигдсон гэж тайлбарласан ч, тухайн номыг бүрэн цахимаас хассан юм. Харин хоёрдугаар сард гарсан Ранья Фарисын “Відступницькі Душі” номд илэрсэн ChatGPT-гийн промтын талаар зохиолч “засварлагчийн алдаа” гэж мэдэгдсэн ч, олон нийтийн шүүмжлэлээс зугтаж чадсангүй. Тэр ч байтугай энэ номын хувьд цаасан хувилбар нь хэвлэгдчихсэн учраас алдааг засах боломжгүй байжээ.
Зохиолчид ChatGPT-ийг уран бүтээлийн туслах болгон ашиглаж буй нь шинэ зүйл биш ч, заримынх нь “мартсан” тэмдэглэл номуудын хуудсанд шууд шингэсэн нь уншигчдын итгэлийг алдах, зохиолчийн мэргэжлийн ёс зүйн тухай асуудлыг дахин хөндөж байна.
