Оросын стартап компани AIDOL (Artificial Intelligence Dynamic Organism Lab) тус улсын анхны хүн дүрст роботыг бүтээснээ Москва хотод Мягмар гарагт олон нийтэд танилцуулжээ. Гэвч “Rocky” киноны алдарт “Gonna Fly Now” хөгжмийн аянд тайзнаа алхаж гарсан робот хэдхэн алхмын дараа нүүрээрээ харуулдан унажээ.
Уналтын бичлэг сошиалд тарж, дэлхий даяар хэлэлцүүлэг болов
Роботын шатаж унаж буй бичлэг богино хугацаанд сошиал орчин, олон улсын хэвлэл нийтлэлээр тархаж, эл явдал хиймэл оюуны хөгжлийн талаарх маргаан, шүүмжлэлийн сэдэв болжээ.
AIDOL-ийн албан мэдэгдэл: “Энэ бол хөгжүүлэлтийн хэвийн процесс”
Инцидентийн дараа AIDOL компани Телеграм хуудсаараа мэдэгдэл гарган, роботыг засварласан тухай мэдээлэв. Түүнчлэн хамар дээрээ шархны наалт, толгойдоо боолттой роботын шинэ бичлэг нийтэлж, робот нь:
“Манай баг цахилгаан тэжээлийг минь засварлаж, камерын дуранг цэвэрлэж өгсөн тул одоо би илүү сайн харж, олон камерын гэрлийн гялбалттай зохицож чадна”
хэмээн ярьж буй дүрсийг түгээжээ.
AIDOL мэдэгдэлдээ:
- Уналт олон улсын хэмжээний сонирхлыг татсанд гайхаж байгаагаа
- Тэд бол ердөө 14 хүний бүрэлдэхүүнтэй, гаднын хөрөнгө оруулалтгүй жижиг стартап гэдгээ
- Энэ нь засгийн газар эсвэл том корпорацын төсөл биш гэдгийг
тодотгосон байна.
Тэд өөрсдийгөө ОХУ-ын дэвшилтэт технологийн салбар дахь цөөн манлайлагчдын нэг, дэлхийн тэргүүлэгч компаниудтай эн зэрэгцэн өрсөлдөхүйц түвшинд ажиллаж байна гэж тодорхойлжээ.
“Оффлайн ярьдаг, нүүрний хувиралттай анхны робот” гэж өөрсдийгөө тодотгов
AIDOL-ийн мэдээлснээр тус баг:
- Нүүрний бүрэн хувиралттай
- Оффлайн горимд ярьдаг
- Утга агуулгын ойлголттой
- Динамик тогтворжуулалттай
хүн дүрст робот бүтээсэн бөгөөд тайзан дээрх уналтыг “дэвшилтэт технологийг хөгжүүлэх үеийн хэвийн үзэгдэл” гэж тайлбарлажээ.
Хүн дүрст роботын салбар дэлхийн томоохон компаниудын төвд байна
Сүүлийн жилүүдэд хүн дүрст роботын хөгжил технологийн шинэ хөрөнгө оруулалтын чиглэл болон хүчээ авч буй. Tesla компани Optimus нэртэй 172 см өндөр робот хөгжүүлж байгаа бөгөөд ирээдүйд хүний оронд аюултай, хүнд хүчир ажлуудыг гүйцэтгэхээр төлөвлөж байна.
AIDOL-ийн хувьд энэхүү танилцуулга тэднийг олон нийтийн өмнө анх удаа томоохон хэмжээнд гаргаж ирсэн үйл явдал болов.
