YouTube гар утасны аппликейшнд шинэ үеийн чатны боломж нэмж, платформ дотороо шууд мессеж илгээх функцийг албан бусаар туршиж эхэллээ. Одоогоор энэ шийдэл нь бүх хэрэглэгчдэд бус, зөвхөн Ирланд болон Польш улсын 18-аас дээш насны тодорхой тооны хэрэглэгчдэд туршилтын журмаар нээгдээд байна.
Видеог шууд чат руу илгээдэг болж байна
Шинэ боломжийн ачаар YouTube-ээс гарч өөр апп руу оролгүйгээр найз руугаа видео “илгээчихээд” шууд чатлах боломжтой болж байна. Видео хуваалцах алхам ч бараг хэвээрээ: хэрэглэгч видео сонгоод “Хуваалцах” товчийг дарж, харилцагчаа сонгон шууд чат нээдэг.
Чат эхлүүлэхийн тулд хоёр тал хоёулаа YouTube дээр харилцаагаа зөвшөөрсөн байх ёстой бөгөөд урилгыг баталгаажуулсны дараа харилцах боломжтой болно.
Мессежийг Google идэвхтэй хянаж байна
Google-ийн тайлбарласнаар апп доторх бүх мессеж YouTube-ийн олон нийтийн удирдамжид захирагдах бөгөөд зөрчилтэй байж болзошгүй контентыг системээр шүүхийн зэрэгцээ шаардлагатай тохиолдолд гараар нягталж үзэх боломжтой гэж анхааруулжээ. Хэрэглэгч өөрийн илгээсэн мессежийг устгах, эсвэл илгээх үйлдлийг цуцлах сонголттой хэвээр байна.
YouTube нийгмийн сүлжээ рүү бүрэн шилжих үү?
Хэрэв туршилт амжилттай болж, функц бүх хэрэглэгчдэд нээгдвэл YouTube нь зөвхөн видео хостинг бус, Facebook, TikTok зэрэгтэй адил контент хуваалцахын зэрэгцээ хэрэглэгч хоорондын харилцааг багтаасан бүрэн хэмжээний нийгмийн сүлжээний шинж чанартай болно.
Гэвч ийм нэгдсэн орчинд мессежийн агуулгыг зохицуулах, хяналт тавих, дүрэм зөрчсөн тохиолдолд шуурхай арга хэмжээ авах нь зайлшгүй бөгөөд YouTube-ийн хувьд хамгийн эмзэг, чухал сорилт байсаар байна.
2 сэтгэгдэл
YouTube ийм шинэ функц туршиж байгаа нь сонирхолтой юм
Гарсны дараа туршиж үзнэ ээ