The Information: ChatGPT дээрх CPM Meta-гаас гурав дахин өндөр байна
The Information-ийн мэдээлснээр OpenAI нь ChatGPT дээр байрших зар сурталчилгаанд мянган үзэлт тутамд ойролцоогоор 60 ам.долларын үнэ тогтоож байгаа аж. Энэ нь Meta дээрх дундаж түвшнээс гурав дахин өндөр үнэлгээ гэж тайлбарлагджээ.
Аналитик хязгаарлагдана: эхэндээ зөвхөн үзэлт, товшилтын өгөгдөл
Гэсэн ч OpenAI нь зар сурталчилгаа эрхлэгчдэд Google эсвэл Meta-тай адил нарийвчилсан тайлан мэдээлэл өгөхөөр төлөвлөөгүй байна. Тухайлбал, хэрэглэгч зар үзсэний дараа худалдан авалт хийсэн эсэх, ямар нэг зорилтот үйлдэл гүйцэтгэсэн эсэх зэрэг “гүн” хэмжүүрүүдийг шууд олгохгүй. Эхний шатанд реклам байршуулсан талууд зөвхөн үзэлт, товшилт зэрэг ерөнхий гүйцэтгэлийн үзүүлэлтүүд авах төлөвтэй гэж мэдээлжээ. Цаашид аналитикийн боломжийг өргөтгөх хувилбар үгүйсгэгдэхгүй ч одоогийн байр суурь нь илүү хязгаартай байна.
OpenAI: өгөгдөл зарахгүй, чатыг нууцална гэсэн амлалтаа онцолсон
Саяхан ChatGPT дээр зар оруулах талаарх мэдээллээ танилцуулахдаа OpenAI хэрэглэгчдийн өгөгдлийн хамгаалалтад анхаарна гэдгээ давхар тодотгосон байна. Тус компани хэрэглэгчдэд тэдний өгөгдлийг зарахгүй бөгөөд харилцан яриаг нууцлах болно гэж амласан гэж мэдээлжээ.
Зар хэнд, ямар нөхцөлд харагдах вэ
Эхний зар сурталчилгаанууд ChatGPT-ийн үнэгүй болон доод түвшний хэрэглэгчдэд ойрын долоо хоногуудад гарч эхлэх бөгөөд 18-аас доош насныханд харуулахгүй гэжээ. Мөн сэтгэцийн эрүүл мэнд, улс төр зэрэг эмзэг сэдвийн хүрээнд явагдсан чатуудад зар гаргахгүй байх зохицуулалт хэрэгжинэ гэж мэдээлэгдсэн байна.
