QR код уншуулж, хөтчөөр шууд сонсож, унших боломжтой боллоо
Ватикан дахь Гэгээн Петрийн Папын сүм ёслолын явцын орчуулгыг хиймэл оюун ухаанд суурилан бодит цаг хугацаанд хүргэдэг шинэ шийдэл ашиглаж эхэлжээ. Engadget-ийн мэдээлснээр уг үйлчилгээг Translated компанитай хамтран хөгжүүлсэн бөгөөд нийт 60 хэлийг дэмждэг байна.
Зочдод тусгай QR код сканнердахыг санал болгож, үүний дараа ёслолын шууд орчуулгыг текст болон аудио хэлбэрээр хүлээн авах боломжтой аж. Үйлчилгээ нь тусдаа апп шаардахгүй, зөвхөн хөтчөөр нээгдэх вэб хуудсаар ажиллахаар зохион бүтээгдсэн гэжээ.
“Эв нэгдлийн хэрэгсэл” болох зорилготой гэж Ватикан онцоллоо
Ватикан энэ хэрэгсэл нь өөр өөр орны мөргөлчдөд ёслолын агуулгыг илүү ойлгомжтой болгох зорилготой гэж тайлбарласан байна. Базиликийн хамба лам Кардинал Мауро Гамбетти уг төслийг Католик сүмийн нийтлэг эрхэм зорилготой нийцэж, итгэгчдийн хоорондын харилцан ойлголцыг нэмэгдүүлэхэд чиглэнэ гэж онцолжээ.
“Би Translated-тэй хамтран ажилласанд маш их баяртай байна. Энэ зуун жилийн ойн жилд бид ирээдүйг болгоомжтой, хянамгай харж, итгэлээр удирдуулсан хүний авьяас чадвар нь эв нэгдлийн хэрэгсэл болж чадна гэдэгт итгэлтэй байна” гэж Engadget базиликийн хамба ламын хэлснийг иш татав.
Технологийн суурь шийдэл нь Translated компанийн 2024 онд танилцуулсан Lara орчуулгын систем дээр тулгуурлажээ. Тус компани уг загварыг 500,000 гаруй мэргэжлийн уугуул орчуулагчдын туршлагад түшиглэн сургасан гэж мэдээлсэн байна.
