Apple компани дэлхий даяарх оператив санах ойн хомсдолтой нүүр тулж, үүний улмаас Mac mini болон Mac Studio загваруудын нийлүүлэлтэд ноцтой саатал үүсээд байна.
АНУ дахь Apple Store-ийн мэдээллээс үзэхэд RAM-ийн багтаамж нэмэгдүүлсэн хувилбаруудын хүргэлтийн хугацаа дөрвөөс таван сар хүртэл сунжирчээ. Тухайлбал, M4 Pro чиптэй, 64 GB санах ойтой Mac mini загвар одоогоор 16-18 долоо хоногийн дараа хүргэгдэхээр байна.
Зөвхөн өндөр үзүүлэлттэй хувилбарууд биш, энгийн суурь загварууд ч мөн ижил асуудалтай тулгарч эхэлжээ. 16 GB RAM-тай, 599 ам.долларын үнэтэй үндсэн Mac mini хүртэл ойролцоогоор нэг сарын сааталтай байгаа нь энэ хүндрэл хэр өргөн хүрээтэй болсныг харуулж байна.
Mac Studio загварын хувьд ч нөхцөл байдал төдийлөн өөр биш байна. M3 Ultra чиптэй, 256 GB RAM бүхий хувилбарын хүргэлт таван сар хүртэл хойшилж байгаа бол дэлгүүрээс очиж авах боломжийг зөвхөн есдүгээр сараас санал болгож эхэлжээ.
Үүнтэй зэрэгцэн Apple Mac Studio-д зориулсан 512 GB оператив санах ойн сонголтыг бүр хассан нь анхаарал татаж байна. Энэ нь тодорхой бүрэлдэхүүн хэсгийн нийлүүлэлтэд хязгаарлалт үүссэнийг илтгэж байж магадгүй гэж ажиглагчид үзэж байна.
Энэ хомсдлын гол шалтгааныг хиймэл оюуны сервер барьж буй компаниудын санах ойн хэрэгцээ огцом өссөнтэй холбон тайлбарлаж байна. Ийм системүүд асар их хэмжээний RAM шаарддаг тул дэлхийн зах зээл дээрх нөөцийн төлөөх өрсөлдөөн эрс ширүүсчээ.
Хэдийгээр санах ойн чипийн үнэ аажмаар тогтворжиж, зарим тохиолдолд бага зэрэг буурч эхэлж байгаа ч түүхэн дундаж түвшнээсээ өндөр хэвээр байгаа юм. Иймээс Mac төхөөрөмжүүдийн нийлүүлэлтийн асуудал ойрын хугацаанд хурдан хэвэндээ орно гэж үзэхэд хэцүү байна.
