Албан ёсны тайлбар нь ерөнхий байсан ч шинэчлэлд хоёр тодорхой засвар багтсан нь дараа нь ил болов
Apple өнөөдөр iPhone 11 болон түүнээс хойших загваруудад зориулсан iOS 26.4.1 жижиг шинэчлэлээ албан ёсоор гаргалаа. Эхний хувилбарын тайлбарт зөвхөн ерөнхий утгатай “алдаа засварууд” гэж дурдсан байсан ч удалгүй энэ шинэчлэлд орсон хоёр тодорхой өөрчлөлтийн талаар дэлгэрэнгүй мэдээлэл гарч ирсэн байна.
Эхлээд 9to5Mac хэвлэл Apple-ийн хөгжүүлэгчдийн форум дээрх хэлэлцүүлгийг онцолж, iOS 26.4.1 нь iOS 26.4 хувилбарт гарсан, зарим аппликэйшнд iCloud синк ажиллахад нөлөөлж байсан алдааг зассан байж магадгүй гэсэн таамгийг дурджээ.
Мөн Apple-ийн байгууллагын хэрэглэгчдэд зориулсан тусламжийн баримтад, iPhone төхөөрөмж iOS 26.4-өөс iOS 26.4.1 рүү шинэчлэгдэх үед “Төхөөрөмж хулгайгаас хамгаалах” функц автоматаар идэвхждэг гэж тэмдэглэсэн байна. Энэ нь магадгүй байгууллага, компанийн удирдлагад байгаа төхөөрөмжүүдэд голчлон хамаарч байгаа бололтой. Учир нь энгийн хэрэглэгчдийн хувьд энэ тохиргоо iOS 26.4 хувилбараас эхлэн анхнаасаа идэвхтэй болсон байжээ.
Хулгайгаас хамгаалах функц нь нууц үг мэддэг этгээдээс ч iPhone-ийг хамгаалах зорилготой
“Төхөөрөмж хулгайгаас хамгаалах” боломж нь анх iOS 17.3 дээр гарч ирсэн бөгөөд зөвхөн iPhone-ийг хулгайд алдахаас гадна, хулгайч төхөөрөмжийн нууц үгийг ч мэддэг нөхцөлд нэмэлт хамгаалалт бий болгох зорилготой юм. Энэ нь, жишээлбэл, олон нийтийн газар хэн нэгэн таны нууц кодыг ажиглаж хараад дараа нь утсыг тань хулгайлах эрсдэлийг бууруулахад чиглэсэн шийдэл аж.
Энэ функц идэвхтэй үед iPhone дээрх олон чухал үйлдлийг заавал Face ID эсвэл Touch ID-оор баталгаажуулах шаардлагатай болдог. Үүнд iCloud Keychain дахь нууц үг болон түлхүүрүүдэд хандах, Apple Card-ийн хүсэлт илгээх, Lost Mode-г унтраах, төхөөрөмжийг бүрэн reset хийх, Safari дээр хадгалсан төлбөрийн мэдээллийг ашиглах зэрэг үйлдлүүд багтдаг. Хамгийн чухал нь Face ID эсвэл Touch ID шалгалтыг давахгүй бол нөөц нууц үг ашиглан тойрох боломжгүй байдаг.
Харин Apple ID-ийн нууц үгийг өөрчлөх зэрэг хамгийн мэдрэмтгий үйлдлүүдэд нэмэлт аюулгүй байдлын саатал үйлчилдэг. Хэрэглэгч эхлээд Face ID эсвэл Touch ID-оор өөрийгөө баталгаажуулж, дараа нь нэг цаг хүлээгээд дахин нэг удаа баталгаажуулах шаардлагатай болдог. Гэхдээ гэр, ажил зэрэг системийн хувьд “танил” гэж тооцогдсон байршлуудад ийм саатал хэрэгжихгүй байна.
iOS 26.4 гарч ирэхээс өмнө энэ функц бүх iPhone дээр анхнаасаа идэвхгүй байсан бөгөөд хэрэглэгчид үүнийг Settings доторх Face ID & Passcode хэсгээс гараар асаах шаардлагатай байжээ.
