Artemis II буцахын өмнө түүхэнд үлдэх ховор агшнуудыг буулгав
Artemis II нислэг төгсгөлийн шатандаа орж байна. 2026 оны дөрөвдүгээр сарын 10-нд Orion сансрын хөлгийн экипаж Сарыг тойрсон 10 хоногийн аяллынхаа дараа дэлхийд буцаж ирэхээр төлөвлөжээ. Гэвч буухаасаа өмнө ч сансрын нисэгчид түүхэнд үлдэхүйц нэгэн чухал зүйлийг аль хэдийн хийж амжсан байна. Тэд гүн сансраас эх дэлхийг маань харуулсан шинэ, онцгой зургуудыг олон нийтэд хүргэлээ.
Эдгээрийн дундаас хамгийн анхаарал татсан зураг нь “Earthset” буюу “Дэлхийн жаргалт” хэмээн нэрлэгдэж буй агшин байв. Энэ нь олон хүнд танил “Дэлхийн мандалт” зурагны эсрэг дүр зураг юм. Өөрөөр хэлбэл, эх дэлхий Сарны хаяаны цаагуур шингэн алга болж байгаа мэт харагддаг үзэгдэл аж. Энэ зураг нь 1968 онд Apollo 8 нислэгийн үеэр авсан домогт “Earthrise” зурагт орчин үеийн нэгэн шинэ хариу болсон гэж хэлж болно.
Сарнаас харсан Дэлхий нимгэн гэрэлтсэн дэвсгэртэйгээр харагджээ
Зураг дээр Нарны гэрэлд хэсэгчлэн туссан Дэлхийн нимгэн хагас сар мэт дүрс харагдана. Ялангуяа Номхон далай, Номхон далайн арлуудын орчмын бүсэд үүл болон далайн тусгал тод ялгарч байгаа бол гаригийн нөгөө хэсэг нь харанхуй шөнийн бүсэд автсан байна.
Урд хэсэгт нь Сарны гадаргуу маш тод дүрслэгдсэн нь зургийн онцгой мэдрэмжийг улам хүчтэй болгожээ. Кратерууд, сав газар, өндөр намын ялгаа нь Сарны барзгар хөрсийг тодруулан харуулж, орон зайн гүн мэдрэмж төрүүлж байна. Мөн Сарны өдөр, шөнийн заагийг илэрхийлдэг “терминатор” шугам урт сүүдэр үүсгэсэн нь зургийг илүү драматик харагдуулжээ.
Энэ ховор агшныг 2026 оны дөрөвдүгээр сарын 6-ны өдөр АНУ-ын зүүн бүсийн цагаар 18:41-д, Orion хөлөг Сарны цаад талаар нисэж байх үед авчээ. Яг энэ мөчид дэлхийтэй холбоо түр тасардаг тул зураг авалт нь илүү онцгой нөхцөлд хийгдсэн байна.
Зөвхөн нэг зураг биш, бүхэл бүтэн түүхэн цуглуулга
Сарыг долоон цагийн турш тойрох үеэр экипаж хэдэн мянган зураг авч амжжээ. Тэдгээрийн дотор Сарны тойрог замаас харсан бүтэн нар хиртэлт, Нарны аймгийн бусад гаргийн гэрэл, мөн Сарны гадаргуу болон кратеруудын өндөр нарийвчлалтай зургууд багтаж байна.
Эдгээр зураг нь зөвхөн харахад гайхалтай байгаад зогсохгүй, шинжлэх ухааны өндөр ач холбогдолтой. Цаашдын сарны болон гүн сансрын нислэгүүдэд шаардлагатай ажиглалт, мэдээллийг ч мөн агуулж байгаа юм.
Эх дэлхийгээ алсаас харах нь яагаад чухал вэ
Ийм зургууд сансрыг судлахад туслахаас гадна Дэлхийгээ харах бидний өнцгийг өөрчилдөг. Гариг маань хэчнээн жижиг, эмзэг болохыг алсаас харсан үед илүү тод мэдэрдэг. Энэ нь шинжлэх ухааны нээлт байхаас гадна хүн төрөлхтний өөрийгөө ойлгох ойлголтод ч нөлөөлдөг хүчтэй туршлага юм.
Artemis II бол зүгээр нэг ээлжит сансрын нислэг биш. Энэ нь хүн төрөлхтөн гүн сансарт дахин эргэн орж буй том алхам бөгөөд ирээдүйн сарны буултанд бэлтгэж буй бодит эхлэл юм. Үүний зэрэгцээ хамгийн чухал нээлт заримдаа өөр гариг дээр биш, харин өөрийн гарагийг шинэ өнцгөөс харах тэр мөчид төрдгийг сануулж байна.
