Apple компани 2025 оны WWDC арга хэмжээний үеэр AirPods чихэвчнийхээ томоохон шинэчлэлийг танилцуулахаар төлөвлөж байна. The Verge сайтын мэдээлснээр, шинэ функцийн хүрээнд AirPods-ийн ишийг товшиж iPhone эсвэл iPad-ын камерыг удирдах боломжтой болох аж. Ингэснээр хэрэглэгчид гар утсаа барихгүйгээр зураг дарах боломжтой болно.
Мөн чихэвчний эзэн унтаж эхэлсэн тохиолдолд хөгжим, подкастын тоглуулалтыг автоматаар зогсоох функц нэмэгдэхээр төлөвлөгдөж байна. Энэ нь хэрэглэгчийн унтаж буйг илрүүлэх системд суурилна. Гэхдээ энэ үйлдэл Apple Watch шаардлагатай эсэх нь одоогоор тодорхойгүй байна.
Түүнчлэн, Apple компани толгой хөдөлгөх үйлдлээр дууны хүчийг тохируулах шинэ дохио нэмэх талаар судалж байгаа аж. Энэ нь одоогоор байгаа “Conversation Awareness” буюу ярианы үед орчны чимээг бууруулж, дууг тохируулах функцтэй уялдах болно. Мөн AirPods-д студийн чанартай микрофон горим нэмэгдэж, дуу чимээг илүү сайн тусгаарлах чадвартай болох хүлээлттэй байна.
Боловсролын салбарт ашиглах боломжийг ч хялбарчлах гэж байгаа бөгөөд сургуулиудад нийтлэг ашиглагддаг iPad төхөөрөмжүүдэд AirPods-ийг хялбар холбох шийдэл танилцуулагдана.
Эдгээр шинэчлэлүүдийг 2025 оны зургадугаар сарын 9-нд болох WWDC арга хэмжээний үеэр танилцуулах төлөвтэй байна.
