Хятадын цахим худалдааны аварга гэгддэг “Alibaba” компани хиймэл оюун ухаанд суурилсан шинэ төрлийн ухаалаг нүдний шил үйлдвэрлэж буйгаа албан ёсоор мэдэгдлээ. Энэхүү бүтээгдэхүүн нь тус компанийн зохион бүтээсэн дотоодын хиймэл оюуны загваруудаар ажилладаг бөгөөд 2025 оны эцэс гэхэд хэрэглэгчдийн гарт хүрэх төлөвтэй байна.
“Quark AI” нэртэй энэхүү нүдний шил нь зүүж хэрэглэх төхөөрөмжүүдийн дараагийн шатанд тооцогдохуйц, гараар оролцохгүйгээр олон төрлийн үйлдэл гүйцэтгэх боломжийг олгохоор бүтээгдэж байна. Тухайлбал:
- Гар хүрэхгүйгээр утсаар ярих
- Хөгжим сонсох
- Хэлний шууд орчуулга хийх
- Хурлын тэмдэглэл хөтлөх
- Камерын тусламжтай дүрс бичлэг хийх
Түүнчлэн “Quark AI” шил нь “Ray-Ban” болон “Meta”-гийн хамтарсан ухаалаг нүдний шил, мөн “Xiaomi” компанийн хиймэл оюун бүхий төхөөрөмжүүдтэй өрсөлдөх зорилготойгоор танилцуулагдаж байгаа юм.
Хэрэглээний ухаалаг үйлчилгээтэй нэгдэнэ
“Alibaba” компани энэхүү ухаалаг шилийг ашиглан цахим үйлчилгээний экосистемээ нэгтгэх томоохон алхам хийж байна. Тухайлбал, хэрэглэгчид:
- “Alipay” аппликейшнаар төлбөр тооцоо хийх
- “Taobao” цахим платформ дээр онлайн дэлгүүр хэсэх
- Газрын зураг ашиглан замын чиглэл хайх
зэрэг олон үйлчилгээг нэг төхөөрөмжөөс ашиглах боломжтой болох ажээ.
Ханжөү хотод төвтэй “Alibaba” компани нь зөвхөн цахим худалдаа бус, хиймэл оюун ухаан, санхүү, аялал жуулчлал, газрын зураг зэрэг олон салбарт нөлөө бүхий тоглогч юм. Харин түүний харьяа “Ant Group” компани нь Хятадад өргөн хэрэглэгддэг “Alipay” мобайл үйлчилгээний системийг хариуцдаг.
Одоогоор “Quark AI” шилний үнэ, техникийн үзүүлэлтүүд албан ёсоор зарлагдаагүй байгаа ч SIGGRAPH 2025 зэрэг олон улсын технологийн арга хэмжээнүүдээр дэлгэрэнгүй танилцуулна хэмээн компанийн зүгээс мэдээлээд байна.
2 сэтгэгдэл
Alibaba үнэхээр шинэ технологийн чиглэлд хурдтай хөгжиж байна. Ухаалаг нүдний шил сонирхолтой сонсогдож байна!
AI-тай холбогдсон шил ирээдүйд их хэрэгтэй эд болох байх