TrendForce: Шинэ MacBook Air-ээс доогуур ангилалд байрлана
Шинэ аналитик тайланд дурдсанаар Apple компани 12.9 инчийн дэлгэцтэй MacBook дээр ажиллаж байгаа бөгөөд энэ нь компанийн хамгийн боломжийн үнэтэй загваруудын нэг болох төлөвтэй байна. TrendForce-ийн тайланг MacRumors онцолсноор, шинэ төхөөрөмжийг 2026 оны 3 эсвэл 4-р сард зах зээлд гаргаж магадгүй бөгөөд MacBook Air-ээс доогуур байрлалтай, илүү хямд шийдэл гэж тодорхойлжээ.
Энэ удаад Apple уламжлалт Mac-ийн M цувралын оронд iPhone-д ашиглагддаг A цувралын процессор сонгох хувилбар яригдаж байгаа нь анхаарал татаж байна. Ийм шийдэл нь анхан болон дунд үнийн сегментэд чиглэсэн бүтээгдэхүүн гаргах зорилготой алхам гэж тайланд дурдсан байна.
A18 Pro чип, M1-тэй ойролцоо гүйцэтгэл яригдаж байна
Урьдчилсан мэдээллээр уг MacBook нь iPhone 16 Pro-д ашигладагтай адил A18 Pro чиптэй байж магадгүй. Тус процессор нь 6 цөмт CPU, 6 цөмт GPU, 16 цөмт Neural Engine-тэй гэж дурдагдсан бөгөөд нийт гүйцэтгэлийн хувьд M1 түвшинд ойртож байгаа хэмээн тайланд тэмдэглэжээ.
Үүнтэй холбоотойгоор шинэ загвар нь Apple-ийн гуравдагч талын жижиглэн худалдаачдаар дамжуулан борлуулж ирсэн M1 дээр суурилсан MacBook Air-ийг орлох байр суурьтай болж ч мэдэхээр байна гэсэн таамаг гарчээ.
Үнэ 599–899 долларын хооронд хэлбэлзэж, хязгаарлалттай ирж магадгүй
Урьдчилсан тооцоогоор АНУ дахь эхлэх үнэ 599–899 ам.долларын хооронд хэлбэлзэх боломжтой бөгөөд хамгийн бодит хувилбар нь 699 эсвэл 799 ам.доллар гэж үзэж байна. Ингэснээр тус загвар нь хямд үнийн сегментэд өрсөлдөх боломжтой болж, албан ёсоор 999 ам.доллароос эхэлдэг MacBook Air-ээс мэдэгдэхүйц доогуур байрлал эзлэхээр зурагдаж байна. Гэхдээ MacBook Air бодит зах зээл дээр хямдралтай үедээ илүү хямд үнээр борлогддогийг мөн дурдсан байна.
Үнийг бууруулахын тулд Apple тодорхой хязгаарлалтууд тавьж магадгүй гэж тайланд онцолжээ. Үндсэн тохиргоо нь 8 ГБ RAM-тай байх хувилбар яригдаж байгаа бөгөөд Thunderbolt-ийн оронд багасгасан зурвасын өргөнтэй стандарт USB-C портуудтай байх боломжтой. Мөн гадаад дэлгэц холбох тал дээр хатуу хязгаарлалттай ирж магадгүй гэсэн мэдээлэл бий.
Ийм зохион байгуулалт нь илүү үнэтэй MacBook Air, MacBook Pro загваруудтай “дотоод өрсөлдөөн” үүсгэхээс зайлсхийх, үнийн шинэ ангилал нээх зорилготой байж болохыг тайланд дурдсан байна.
