Apple болон Google компаниудын хиймэл оюунтай холбоотой хамтын ажиллагаа өмнө төсөөлж байснаас илүү өргөн хүрээтэй болох нь шинэ мэдээллээр тодорхой болжээ. Сүүлийн үеийн эх сурвалжуудын мэдээлснээр Apple компани Gemini загварыг өөрийн дэд бүтэц дээр бараг бүрэн хянах боломжтой болсон байна.
The Information-ийн мэдээлснээр Apple өөрийн дата төвүүдэд Gemini технологид шууд нэвтрэх эрхтэй болсон нь уг технологид суурилсан өөрийн жижиг загваруудыг хөгжүүлэх нөхцөлийг бүрдүүлж байгаа аж. Эдгээр загваруудыг тодорхой функцэд ашиглахын зэрэгцээ шууд төхөөрөмж дээр ажиллуулах боломжтой гэж үзэж байна.
Энэ нь “дистилляци” гэх аргачлалтай холбоотой бөгөөд том хэмжээний хэлний загварын мэдлэгийг илүү жижиг, хөнгөн загварт шилжүүлдэг. Ингэснээр илүү хурдан, эрчим хүч бага зарцуулдаг, байнгын интернет холболт шаарддаггүй шийдлүүдийг бий болгох боломжтой юм.
Ийм төрлийн загварууд нь зөвхөн Gemini-ийн хариуг хуулбарлахаас гадна түүний тооцооллын логикийг ч тодорхой хэмжээнд давтаж чаддаг. Үүний үр дүнд анхны загвартай ойролцоо чанарыг бага нөөцөөр гаргах боломж бүрдэж байна.
Гэсэн хэдий ч энэхүү интеграц нь хүндрэлгүй явагдахгүй байгаа талаар эх сурвалжууд дурдсан. Apple-ийн Siri-г хөгжүүлэх зорилго болон Gemini-ийн чиглэл бүрэн нийцэхгүй байгаа нь загваруудыг тохируулахад саад болж байна.
Хэдий Google-тэй хамтран ажиллаж байгаа ч Apple өөрийн хиймэл оюуны хөгжүүлэлтийг үргэлжлүүлж байгаа. Foundation Models баг дотоод шийдлүүд дээр ажиллаж байгаа ч компанийн нийт стратеги одоогоор бүрэн тодорхой болоогүй хэвээр байна.
Ойрын хугацаанд Siri-тэй холбоотой томоохон шинэчлэлүүдийг зургадугаар сард болох WWDC арга хэмжээн дээр танилцуулах төлөвтэй. Үүнд өмнөх яриаг санах, хэрэглэгчид урьдчилан зөвлөмж өгөх зэрэг боломжууд багтах аж.
2 сэтгэгдэл
Apple хүртэл AI-д ингэж хүчтэй орж ирж байгаа нь сонирхолтой юм
Ирээдүйд утаснууд бүр илүү ухаалаг болох нь дээ