Apple компани iPhone цувралын түүхэн дэх хамгийн том дизайн өөрчлөлтийг хийхээр төлөвлөж байгаа талаар Bloomberg-ийн сэтгүүлч Марк Гурман мэдээллээ. Түүний хэлснээр, удахгүй танилцуулагдах эвхэгддэг iPhone нь өмнөх iPhone 4, iPhone 6, iPhone X загваруудтай адил салбарын чухал үе шат болох хэмжээний шинэчлэл авчрах аж.
Эвхэгддэг дэлгэцтэй шинэ хэлбэр
Шинэ төхөөрөмж нь “ном” хэлбэрийн эвхэгддэг загвартай байх бөгөөд Samsung Galaxy Z Fold төрлийн төхөөрөмжүүдтэй төстэй гэж үзэж байна. Урьдчилсан мэдээллээр:
- Дотоод дэлгэц: 7.7 инч
- Гадна дэлгэц: 5.3 инч
Энэ нь хэрэглэгчдэд видео үзэх, тоглоом тоглох, олон даалгавар зэрэг гүйцэтгэхэд илүү том талбай санал болгоно. Дэлгэцийн нугалаас бараг мэдэгдэхгүй байхаар төлөвлөсөн ч бүрэн алга болохгүй гэж эх сурвалжууд онцолжээ.
Камер ба хамгаалалтын шийдэл
Шинжээч Мин-Чи Куогийн мэдээлснээр төхөөрөмж:
- Хоёр үндсэн камер
- Нэг урд камер
-тэй байх бөгөөд Face ID ашиглахгүй. Үүний оронд асаах товчинд суурилсан Touch ID хурууны хээ уншигчийг ашиглах төлөвтэй байна.
Шинэ iOS систем
Эвхэгддэг төхөөрөмжид зориулан Apple тусгайлан iOS 27 үйлдлийн системийг хөгжүүлж байгаа аж. Энэхүү хувилбар нь iPad-тэй төстэй олон цонхны горим, олон апп зэрэг ажиллуулах боломжийг илүү оновчтой болгоно.
Үнэ ба нээлтийн хугацаа
Шинэ iPhone-ийг есдүгээр сард iPhone 18 Pro болон iPhone 18 Pro Max загваруудтай хамт танилцуулах төлөвтэй байна. Гэхдээ нийлүүлэлт нь Pro загваруудаас хойш эхлэх магадлалтай.
Үнэ нь АНУ-ын зах зээлд хамгийн багадаа 1999 ам.доллароос эхлэх урьдчилсан тооцоо гарчээ.
