Apple компани хиймэл оюун ухааны салбарт стратегийн шинэ үеийг эхлүүлж байна. iOS 27 үйлдлийн системд хиймэл оюун ухааны чадавхийг гурван үндсэн чиглэлээр өргөжүүлэхээр төлөвлөсөн бөгөөд энэ шинэчлэлт 2026 оны 6-р сард танилцагдаж, намар албан ёсоор гарна гэж Bloomberg-ийн шинжээч Марк Гурман мэдээлжээ.
1. Хувийн тохиргоотой ухаалаг хайлтын систем
Apple шинэ Apple Intelligence платформдоо нэгтгэсэн ухаалаг интернет хайлтын систем нэвтрүүлэхээр бэлтгэж байна. Энэхүү систем нь хэрэглэгчийн хүсэлтийг ойлгож, гадны хайлтын системд хандалгүйгээр хувь хүний зан төлөв, сонирхолд тулгуурласан үр дүнг санал болгоно.
Өөрөөр хэлбэл, iPhone хэрэглэгч бүрийн хайлтын үр дүн дахин давтагдашгүй болж, төхөөрөмж нь “чамайг мэддэг” туслахын үүргийг гүйцэтгэнэ.
2. Siri-ийн бүрэн шинэчлэгдсэн хувилбар
Apple-ийн дижитал туслах Siri нь хиймэл оюун ухааны алгоритмд суурилсан шинэ загвартайгаар iOS 27-д дахин төрнө.
Сайжруулсан хувилбар нь iOS 26.4 дээр туршилтын хэлбэрээр гарч ирэх боловч интерфейс, ярианы загвар, гүйцэтгэлийн системийн бүрэн шинэчлэлт нь зөвхөн iOS 27 дээр нэвтрэх аж.
Шинэ Siri нь хэрэглэгчийн дуу хоолой, зуршил, өмнөх асуултуудыг ойлгон илүү нарийн, ухаалаг хариу өгөх чадвартай болох юм.
3. Эрүүл мэндийн ухаалаг туслах
Apple Health+ үйлчилгээний хүрээнд шинэ AI эрүүл мэндийн туслах нэмэгдэх бөгөөд энэ нь хэрэглэгчийн биеийн байдал, зүрхний цохилт, нойр, стрессийн түвшин зэргийг бодит цаг хугацаанд хянаж, зөвлөгөө өгөх болно.
AI туслах нь Apple Watch болон бусад төхөөрөмжөөс цуглуулсан мэдээллийг шинжилж, “танд тохирсон” эрүүл мэндийн төлөвлөгөө боловсруулна. Энэхүү үйлчилгээ нь захиалгын хэлбэрээр нэвтрэх магадлалтай гэж эх сурвалжууд мэдээлжээ.
Apple-ийн шинэ стратегийн зорилго
Марк Гурманы үзэж буйгаар, iOS 27-ийн эдгээр гурван шинэчлэлт нь Apple-ийг хиймэл оюун ухаанд суурилсан эрүүл мэндийн чатбот болон хувийн туслах технологийн тэргүүлэгч тоглогчдын нэг болгож чадна.
