Apple анх удаа эвхэгддэг төхөөрөмжийн зах зээлд нэгэн зэрэг хоёр өөр iPhone загвар гаргахаар төлөвлөж байгаа тухай Өмнөд Солонгосын ETNews мэдээллээ.
Эхний загвар — “ном” хэлбэрийн iPhone
Аналитик компанийн “Stoun Partners”-ийн захирал Ким Ки Хён-ы хэлснээр анхны эвхэгддэг iPhone 2026 онд худалдаанд гарах бөгөөд “ном” хэлбэрийн загвартай байх аж. Энэ нь нээгдэхэд хоёр дэлгэцтэй, iPad mini-тэй төстэй бүтэцтэй байх магадлалтай гэж шинжээчид таамаглаж байна.
Apple компани одоогоор энэхүү төхөөрөмжийн эд ангиудыг Солонгосын ханган нийлүүлэгчидтэй хамтран боловсруулж байгаа бөгөөд эвхэгддэг дэлгэцийн нугалаас, бат бөх бүтэц, батерейн найдвартай байдлыг туршиж байгаа гэж эх сурвалжууд мэдээлжээ.
Хоёр дахь загвар — “flip” буюу хавчих хэлбэр
Хоёр дахь эвхэгддэг iPhone нь 2028 онд худалдаанд гарахаар төлөвлөгдөж байгаа бөгөөд энэ удаа сонгодог “flip” форматаар, Samsung Galaxy Z Flip болон Motorola Razr-тай төстэй хэлбэртэй байх аж.
Apple-ийн инженерүүд илүү нимгэн уян дэлгэц, хөнгөн нугасны механизм, M-серийн тусгай чип бүхий шинэ архитектур туршиж байгаа бөгөөд энэ нь төхөөрөмжийг илүү бат бөх, эрчим хүчний хувьд хэмнэлттэй болгоно гэж мэдэгджээ.
2027 он — iPhone-ны 20 жилийн ой
Мөн инсайдеруудын мэдээлснээр Apple компани 2027 онд болох iPhone-ны 20 жилийн ой-г тохиолдуулан олон шинэ технологи нэвтрүүлэхээр төлөвлөж байна. Үүнд хиймэл оюун ухаанд суурилсан камерын систем, ухаалаг дэлгэцийн тохиргоо болон илүү уян хатан материалууд багтах гэнэ.
“Apple нь 2026 онд эвхэгддэг ‘ном’ хэлбэрийн ухаалаг гар утсаа худалдаанд гаргахаар бэлдэж байгаа бөгөөд 2028 оноос эхлэн энэ төрлийн төхөөрөмжийн эгнээг өргөжүүлэхээр зорьж байна,” гэж Stoun Partners компанийн тайланд дурджээ.
