PIRG-ийн тайланд Apple хамгийн доод, Samsung түүнээс арай дээгүүр үнэлгээ авчээ
Apple болон Samsung компаниуд ухаалаг утасны засварлах боломжийн үзүүлэлтээр хамгийн муу үнэлгээ авсан талаар PIRG Education Fund байгууллагын гаргасан “Failing the Fix” тайланд дурджээ. Тус байгууллага электрон төхөөрөмжүүдийн засварлах боломжийг нэгдсэн шалгуураар үнэлсэн байна.
Ухаалаг утасны ангилалд Samsung D үнэлгээ авч сүүлээсээ хоёрдугаарт бичигдсэн бол Apple хамгийн муу буюу D- үнэлгээ авчээ. Харин энэ жагсаалтыг Motorola B+ үнэлгээгээр тэргүүлж, Google C- үнэлгээтэйгээр араас нь бичигдсэн байна.
Үнэлгээг зөвхөн хийцээр бус, задлах төвөгшил, сэлбэг, программын дэмжлэгээр тооцжээ
Энэхүү үнэлгээ нь Европын EPREL буюу European Product Registry for Energy Labelling системд тулгуурласан бөгөөд хэд хэдэн техникийн чухал үзүүлэлтийг хамарсан байна.
Юуны өмнө төхөөрөмжийг задлах, үндсэн засвар хийх төвөгшил гол үзүүлэлт болжээ. Тухайлбал зай солих зэрэг энгийн мэт засвар хийхэд хэдэн алхам шаардлагатай вэ гэдгийг харгалзсан байна. Үүнээс гадна засварын техникийн баримт бичгийн чанар, олдоц, сэлбэг хэрэгслийн хүртээмж болон үнэ, мөн программын дэмжлэг хэр удаан, хэр бүрэн үргэлжлэхийг ч үнэлгээнд оруулжээ. Ялангуяа задлах хүндрэл илүү өндөр жинтэй тооцогдсон бөгөөд энэ нь бодит засвар хийхэд хамгийн шууд нөлөөлдөг үзүүлэлт гэж үзсэн байна.
Ноутбукийн ангилалд ч Apple доогуур үнэлгээ авч, Asus, Acer илүү сайн дүн үзүүлжээ
Тайланд зөвхөн ухаалаг утас бус, ноутбукуудыг ч хамруулсан байна. Энэ ангилалд ч Apple мөн л доогуур үнэлгээ авч, C- дүнтэйгээр аутсайдеруудын нэг болжээ. Lenovo C үнэлгээ авсан бол хамгийн сайн үзүүлэлтийг Asus B+, Acer B үнэлгээгээр үзүүлсэн байна. HP болон Dell хоёулаа B- үнэлгээ авчээ.
Засварлах боломжид зөвхөн техник хангамж бус, аюулгүй байдлын шинэчлэл ч нөлөөлдөг
Тайланд онцолсноор засварлах боломж гэдэг нь зөвхөн төхөөрөмжийн хийцээс хамаардаггүй байна. Цавуу хэт их ашигласан эсэх, задлахад хэр хүндрэлтэй вэ гэдэг нь чухал боловч үүнтэй адил программын хязгаарлалт ч амьдралын мөчлөгт нь нөлөөлдөг аж. Ялангуяа аюулгүй байдлын шинэчлэл зогсох үед төхөөрөмж техник талаасаа бүрэн ажиллаж байсан ч бодит хэрэглээндээ богино настай болдог байна.
Засвар хийх боломж муу байх нь эдийн засаг, байгаль орчинд ч том дарамт болдог
PIRG-ийн тооцоолсноор, хэрэв хэрэглэгчид шинэ төхөөрөмж авахын оронд хуучнаа засварлах бодит боломжтой байвал зөвхөн АНУ-д жил бүр бараг 50 тэрбум ам.доллар хэмнэх боломжтой аж. Үүнтэй зэрэгцэн электрон хаягдал дэлхий дээр хамгийн хурдан өсөж буй хог хаягдлын нэг хэвээр байгаа бөгөөд нэг хүнд дунджаар жилд 11.2 кг орчим ногдож байна.
Мөн судалгаанд хамрагдсан 10 брэндийн 8 нь “засвар хийх эрх”-ийн тухай хуулийн эсрэг байр суурьтай салбарын холбоодын гишүүн гэдгийг тайланд дурджээ.
Apple тодорхой өөрчлөлт хийж эхэлсэн ч нийт үнэлгээ нь одоогоор доогуур хэвээр байна
Гэсэн ч үйлдвэрлэгчдийн хандлагад багагүй өөрчлөлт гарч эхэлж байгааг тайланд тэмдэглэсэн байна. Тухайлбал, Apple шинэ iPhone загварууддаа Repair Assistant хэрэгслийг нэвтрүүлж, өмнө нь хязгаарлагддаг байсан жинхэнэ эд ангийг заавал тусгай баталгаажуулалтгүйгээр дахин ашиглах боломжийг нээжээ.
PIRG-ийн зүгээс АНУ-д Европын үнэлгээний системтэй төстэй, нэгдсэн засварлах боломжийн стандарт хэрэгтэй байгааг мөн онцолсон байна. Ингэснээр хэрэглэгчид ямар төхөөрөмж урт наслах, засварлахад амар вэ гэдгийг илүү ойлгомжтой харьцуулж сонгох боломжтой болох аж.
