“Үйлдвэрлэлийн түвшинд боломжгүй” гэгдэж байсан технологи хэрхэн бодит болсон бэ?
Apple ихэвчлэн бүтээгдэхүүнийхээ хэрэглээ, дизайн, хэрэглэгчийн туршлагын талаар ярьдаг ч энэ удаа ховорхон тохиох зүйл болсон. Тус компани Apple Watch Ultra 3, Watch Series 11 болон нимгэн хөнгөн iPhone Air-ийн титан их биеийг хэрхэн үйлдвэрлэж байгаагаа дэлгэрэнгүй тайлбарлажээ. Үүнээс өмнө Apple-ийн өөрсдийнх нь хэлж байснаар ийм төрлийн 3D титан хэвлэлийг “үйлдвэрлэлийн хэмжээнд хэрэгжүүлэхэд бараг боломжгүй” гэж үздэг байсан байна.
Apple-ийн тайлбарласнаар Watch Ultra 3 болон Watch Series 11-ийн их бие нь дахин боловсруулсан титан нунтаг ашигласан 3D хэвлэх тусгай технологиор хийгддэг. Өөрөөр хэлбэл уламжлалт механик боловсруулалт, сийлбэр, хайчилгаа зэргийг хэсэгчлэн орлох, шинэ үеийн үйлдвэрлэлийн арга руу бүрэн шилжиж эхэлсэн гэсэн үг. Ингэхийн тулд Apple бүх үйлдвэрлэлийн баг, инженерчлэл, материал судлалын мэргэжилтнүүдийн хүчийг нэгтгэж байж үйлдвэрлэлийн шугамдаа нэвтрүүлжээ.
Титан 3D хэвлэл бүтээгдэхүүний чанарт ямар өөрчлөлт авчрав?
Зөвхөн “ногоон” имиж, маркетингийн шийдэл бус, технологийн хувьд ч том ахиц авчирсан гэж Apple онцолсон. Инженерүүдийн хэлснээр 3D хэвлэлд шилжсэнээр Apple Watch Series 11 болон Watch Ultra 3 ухаалаг цагны титан их биеийн бүтцэд илүү нарийн шийдэл оруулах боломжтой болсон. Үүний үр дүнд, ялангуяа гар утасны сүлжээ дэмждэг (cellular) загваруудын хувьд ус, чийгнээс хамгаалах түвшин сайжирчээ.
iPhone Air-ын хувьд ч бас шинэ арга нөлөөлсөн. Нимгэн, хэт хөнгөн байхаас гадна бат бөх байх шаардлагатай USB портын эргэн тойрны титан бүрхүүлийг 3D хэвлэх аргаар бүтээж, механик ачаалал даах чадвар, ашиглалтын тэсвэрийг нэмэгдүүлсэн байна. Энэ бүхэн нь гаднаас харахад жижиг мэт санагдавч инженерийн түвшинд том өөрчлөлт гэж компанийн төлөөллүүд тайлбарлажээ.
Байгаль орчин: Титаны хэрэглээг хоёр дахин бууруулсан нь
3D титан хэвлэлийн гол давуу талын нэг нь түүхий эдийн алдагдлыг эрс багасгадаг явдал. Apple-ийн тооцоолсноор шинэ үйлдвэрлэлийн аргын ачаар 2025 он гэхэд 400 гаруй тонн түүхий титан хэмнэх боломж бүрдсэн байна. Үүнээс гадна нийт титан металлын хэрэглээ өмнөх аргаасаа 50 хувиар буурсан үзүүлэлттэй байгаа гэжээ.
Энгийнээр хэлбэл, өмнө нь цель блок титан дээрээс зорж, хасаж, үй олон үлдэгдэл үүсгэдэг байсан бол одоо зөвхөн шаардлагатай хэсгийг давхарлан бүтээх зарчмаар ажиллаж байгаа тул хаягдал бараг гарахгүй байна. Энэ нь үйлдвэрлэлийн зардлыг бууруулахаас гадна байгаль орчинд эерэг нөлөө үзүүлж байгаа хэмээн Apple онцолсон.
Тус компани 2030 он гэхэд нүүрстөрөгчийн саармаг (carbon neutral) корпораци болох зорилго тавьснаа дахин сануулж, титан 3D хэвлэх технологи нь уг зорилгод хүрэхэд чухал алхам болж байгааг мэдэгдсэн. Материалын хэрэглээ, эрчим хүчний үр ашгийг сайжруулах замаар бүтээгдэхүүний амьдралын мөчлөгийн нийт ул мөрийг бууруулах стратегийн нэг хэсэг гэж дүгнэжээ.
Ирээдүйн iPhone, Watch-уудад юу ирж болох вэ?
Apple-ийн 3D титан хэвлэлийн шийдэл нь одоогоор Apple Watch Ultra 3, Watch Series 11 болон iPhone Air-д төвлөрч байгаа ч ирээдүйд илүү олон бүтээгдэхүүнд нэвтрэх нь тодорхой болж байна. Их биеийн бат бөх байдал, нарийн геометр, болон жин-чанарын харьцааг сайжруулах энэхүү технологийг MacBook, iPad зэрэг бусад шугамд ашиглах боломжтой гэж шинжээчид харж байна.
Apple өмнө нь “үйлдвэрлэлийн түвшинд хийхэд хэтэрхий хэцүү” гэж үздэг байсан технологио богино хугацаанд бодит болгосон нь компанийн инженерчлэлийн амбиц, мөн байгаль орчны зорилгоо технологийн бодит шийдлээр баталгаажуулахыг зорьж байгаагийн илэрхийлэл болж байна.
