Сүүлийн өдрүүдэд Биткойны ханш огцом өсч, шинжээчдийн таамаглалаар энэ сарын сүүлч гэхэд түүхэн дээд амжилт болох 130,000 ам.доллар-т хүрэх магадлалтай болжээ. Түр хугацаанд 111 мянган долларт хүрсэн боловч ханш дахин унаж, өчигдрийн байдлаар 105,400-аас 108,600 ам.доллар хүртэл 3,000 доллараар нэмэгджээ.
Алдарт крипто шинжээч PlanB энэ талаар өөдрөг таамаг дэвшүүлсэн байна. Хэрэв энэ сард RSI (Харьцангуй хүчний индекс) 75 хүрвэл — энэ нь график дээр улбар шар цэгээр тэмдэглэгдэнэ — Биткойн зургаадугаар сарыг 130 мянган долларын ханшаар хаах боломжтой гэж тэрбээр үзжээ.
Ерөнхийдөө RSI 70-аас дээш гарвал тухайн хөрөнгө хэт өндөр үнэлэгдсэн, удалгүй унах эрсдэлтэй гэж үздэг. Гэсэн ч Биткойн уламжлалт эдийн засгийн загваруудыг олонтаа зөрчиж байсан бөгөөд энэ удаа ч мөн адил хандлагатай байна гэж судлаачид тэмдэглэжээ.
Bitwise Asset Management компанийн гүйцэтгэх захирал Гантер Горсли дараах байр суурийг илэрхийлжээ:
“Биткойны ханш 130 мянгаас 150 мянган ам.долларт хүрсний дараа хүмүүс зарахгүй. Харин оронд нь Биткойноо барьцаалж зээл авах хандлага нэмэгдэнэ. Энэ нь эрэлтэд дахин түлхэц өгч, ханшийг улам өсгөх болно.”
Хэрэв дээрх таамаглал биелвэл, Биткойны хувьд 2025 оны хамгийн хүчтэй үнийн өсөлт болж, криптовалютын зах зээлд томоохон өөрчлөлт авчирч магадгүй байна.
