Текстээс дуу, яриатай кино маягийн видео бүтээдэг AI анхаарал татлаа
ТикТок платформыг эзэмшдэг Хятадын технологийн компанийн хөгжүүлсэн хиймэл оюуны шинэ систем энэ долоо хоногт Холливүүдийн анхаарлыг хүчтэй татаж байна. ByteDance-ийн Seedance 2.0 нэртэй аппликэйшн нь хэрэглэгчийн текстээр өгсөн зааврын дагуу дууны эффект, харилцан яриа бүхий өндөр чанартай видео дүрс бүтээдэг болсон гэж мэдээлжээ.
Тус системээр Spider-Man, Deadpool зэрэг олон нийтэд танигдсан кино дүрүүдийг ашиглан хийсэн видео бичлэгүүд цахим орчинд тарж, хүмүүсийг гайхшируулж байгаа аж.
Эхний хувилбар “чимээгүй” байсан бол 2.0 нь бодит дуулиан болов
Seedance-ийн эхний хувилбар 2025 оны зургаадугаар сард зах зээлд гарсан ч төдийлөн анхаарал таталгүй өнгөрсөн байна. Харин найман сарын дараа танилцуулагдсан хоёр дахь хувилбар нь чанарын түвшнээрээ бодитоор шуугиан үүсгэж эхэлжээ.
Videostate студийн Ян-Виллем Блом “Анх удаагаа би хиймэл оюун видео бүтээхдээ сайн болсныг биш, харин жинхэнэ кино үйлдвэрлэлийн эцсийн бүтээгдэхүүн гаргаж байгааг харлаа” гэж магтсан байна. Түүний тайлбараар өрнөдийн системүүд видео үүсгэх тал дээр урагшилж байгаа ч Seedance нь дүрс, дуу, яриа зэрэг олон элементийг нэгтгэсэн “цогц” бүтээгдэхүүн гаргаж байгаагаараа онцлог гэжээ.
AI ёс зүй судлаач Маргарет Митчелл мөн Seedance нь Midjourney болон OpenAI-ийн Sora шиг богино текст заавраар видео үүсгэх чадвартайгаас гадна текст, дүрс, аудиог нэг дор нэгтгэсэн өндөр чанартай эцсийн үр дүн гаргаж буй нь илүү анхаарал татаж байна гэж онцолсон байна.
Оюуны өмчийн асуудал хурцдаж, том студиуд шаардлага тавив
Seedance-ийн чадварыг сайшаахын зэрэгцээ оюуны өмчийн маргаан зэрэгцэн идэвхжиж эхэлжээ. Spider-Man, Darth Vader зэрэг хуулиар хамгаалагдсан дүрүүдийг ашиглан видео үүсгэж байгаа нь зохисгүй гэж үзэн Disney, Paramount зэрэг Холливүүдийн студиуд ByteDance-ээс ийм контент үүсгэхэд дүрүүдээ ашиглуулахгүй байх шаардлага тавьсан байна.
Мөн Японы талын компаниуд анимэ дүрүүдийг ашигласан бичлэгүүд олон нийтэд тарсны дараа ByteDance оюуны өмчийн хууль зөрчсөн эсэхийг шалгаж эхэлсэн гэж мэдээлэгдэж байна. Харин ByteDance өөрийн зүгээс оюуны өмчийн хамгаалалтаа сайжруулах арга хэмжээ авч байгаа гэж мэдэгдсэн байна.
Өмнө нь OpenAI-ийн Sora платформтой холбоотой ижил асуудал сөхөгдөх үед Disney өөрийн дүрүүдийг ашиглуулах эрхийг 1 тэрбум ам.доллараар зарсан тухай мэдээлэл ч дурдагдаж байна.
Жижиг продакшнууд боломж гэж харж, “бичил драм” зах зээл тэлж байна
Нөгөө талд Seedance зэрэг системүүдийг жижиг компаниуд боломж гэж харж байгаа аж. Сингапурын Tiny Island Production компанийн Квок ийм төрлийн хиймэл оюуны шийдэл нь бага зардлаар том хэмжээний бүтээл хийх нөхцөл бүрдүүлж байгааг сайшаажээ.
Тэрээр Азид хиймэл оюунаар бүтээсэн бичил драмууд олноор үйлдвэрлэгдэх болсон тухай ярьсан байна. Тухайлбал тус бүр 2 минутын урттай 80 хэсгээс бүрдэх бүтээлийн нийт зардал ойролцоогоор 140,000 ам.доллар болдог гэжээ. Романс, гэр бүлийн драм нь видео эффект бага шаарддаг учраас үүнээс ч бага өртгөөр хийх боломж нэмэгдсэн байна.
Хятадын AI хөгжлийн дараагийн “үзэгдэл” болж, 2026 оны хүлээлт нэмэгдэв
Seedance нь Хятадын хиймэл оюуны хөгжлийн дараагийн том үзэгдэл болж байна гэж тайлбарлажээ. Өнгөрсөн онд өрнөдийн өрсөлдөгчидтэй харьцуулахад бага зардлаар бүтээгдсэн DeepSeek хиймэл оюуны загвар дэлхий даяар шуугиан тарьсан нь энэ чиг хандлагыг улам тодруулсан.
Мөн энэ долоо хоногт Хаврын баярын гала концертын үеэр Хятадын робот технологи ямар түвшинд хүрснийг дэлхий нийт харсан гэж мэдээлэлд дурджээ. Судлаач Билл Бишоп 2026 он Хятадад хиймэл оюуныг массын хэрэглээнд нэвтрүүлэх эргэлтийн жил болно гэсэн таамаг дэвшүүлсэн байна.
