Google компани Chrome хөтчийн ширээний хувилбарт хиймэл оюун ухаанд суурилсан шинэ функцыг танилцууллаа. Энэхүү шинэчлэл нь хэрэглэгчдэд онлайн дэлгүүрүүдийн шүүмжүүдийг нэгтгэн, товч дүгнэлт байдлаар харуулдаг бөгөөд аюулгүй, хялбар худалдан авалтыг дэмжих зорилготой юм.
Шинэ функц нь одоогоор зөвхөн АНУ-д, зөвхөн Chrome хөтчийн ширээний хувилбарт ашиглах боломжтой. Үүнийг идэвхжүүлсний дараа хаягийн талбарын хажууд тусгай тэмдэгт гарч ирэх бөгөөд уг тэмдэгт дээр дарснаар тухайн дэлгүүрийн талаар AI-аар боловсруулсан тойм цонх нээгдэх аж.
Хиймэл оюун ухаан нь Google Shopping болон баталгаажсан түнш платформуудаас цуглуулсан олон мянган хэрэглэгчийн шүүмжийг боловсруулж, тухайн дэлгүүрийн нэр хүндийг дараах үзүүлэлтүүдээр үнэлдэг:
- Бүтээгдэхүүний чанар
- Үнэ
- Харилцагчийн үйлчилгээ
- Хүргэлтийн хугацаа
- Буцаалтын бодлого
Эдгээр үнэлгээг AI нэгтгэн дүгнэж, таван онооны системээр ерөнхий үнэлгээг харуулдаг. Ингэснээр хэрэглэгчид олон зуун сэтгэгдлийг нэг бүрчлэн унших шаардлагагүй, дэлгүүрийн найдвартай байдлыг түргэн шуурхай үнэлэх боломжтой болж байна.
Хэдийгээр уг функц зөвхөн англи хэл дээр ажиллаж байгаа ч Google энэ технологийг өргөжүүлж, цаашид бусад оронд болон гар утасны хувилбарт нэвтрүүлэх төлөвтэй байгаа талаар олон улсын хэвлэлүүд онцолжээ.
Google Chrome-ын энэхүү шинэ боломж нь хиймэл оюун ухааныг зөвхөн хайлтын системд төдийгүй хэрэглэгчийн худалдан авалтад шууд дэмжлэг үзүүлдэг хэрэгсэл болгон өргөжүүлж, зах зээл дээрх өрсөлдөөнд тэргүүлэгч байраа баталгаажуулах алхам болж байна.
