Пүрэв гарагийн орой дэлхийн өнцөг булан бүрт байрлах Starlink хэрэглэгчид гэнэт сүлжээнд нэвтрэх боломжгүй болсон нь интернетийн салбарт чимээгүй хямрал үүсгэсэн юм. Хиймэл дагуулд суурилсан энэхүү интернэтийн үйлчилгээ дэлхий даяар офлайн болсон талаар олон мянган хэрэглэгч гомдол гаргаж, Downdetector платформ дээр тасалдлын мэдээлэл хэдхэн минутын дотор тэсрэлттэй өссөн байна.
Downdetector-ийн мэдээлснээр тасалдал 15:24 цагт (ET) эхэлсэн бөгөөд хэрэглэгчдийн мэдээлэл хурдтай өсч, 15:39 цаг гэхэд 58,000-д хүрч оргилдоо хүрсэн байна. 16:01 цаг гэхэд уг тоо буурсан ч 34,000 орчим хэрэглэгч асуудалтай хэвээр байсан аж.
Starlink өөрсдийн албан ёсны X (хуучнаар Twitter) хуудсаараа дамжуулан тасалдлыг баталгаажуулж, “шийдвэрийг идэвхтэй хэрэгжүүлж байгаа”-гаа мэдэгдэж, асуудал бүрэн шийдэгдмэгц шинэчлэлт хийхээ амласан. Илүү тодорхой мэдээлэл өгөхийн оронд хэрэглэгчдийг хүлээцтэй байхыг хүссэн юм.
Starlink-ийн үүсгэн байгуулагч Илон Маск мөн X дээр өөрийн биеэр мэдэгдэл хийж, хэрэглэгчдээс уучлалт гуйгаад “Үйлчилгээ тун удахгүй сэргэнэ. Тасалдсан явдалд уучлаарай. Үндсэн шалтгааныг SpaceX засах болно” хэмээжээ.
Түүнчлэн Starlink-ийн албан ёсны вэбсайт ч мөн адил түр хугацаанд ажиллагаагүй болж, “хүчин төгөлдөр хийсвэр байхгүй” гэсэн алдаа илэрч, хэрэглэгчдийн бухимдлыг нэмэгдүүлсэн байна.
Энэхүү өргөн цар хүрээтэй тасалдал нь зөвхөн нэг бүс нутагт бус Хойд Америк, Европ, Африк зэрэг тивийн хэрэглэгчдэд нөлөөлсөн байна. Холболтгүй болсон тухай мэдээлэл АНУ-ын Колорадо муж, Германы хэд хэдэн хот, мөн Зимбабве зэрэг улс орнуудаас ирж, асуудал зөвхөн орон нутгийн биш, дэлхий нийтийн хэмжээнд гарсан гэдгийг баталжээ.
Энэхүү сүлжээний доголдол нь Илон Маск саяхан Starlink-ийн “Direct to Cell” буюу хиймэл дагуултай гар утсыг шууд холбох шинэ үйлчилгээгээ таниулснаас хэдхэн цагийн дараа тохиолдсон нь технологийн найдвартай байдлын тухай эргэлзээг дахин төрүүлж байна. Direct to Cell үйлчилгээ нь хэрэглэгч гар утсаараа дамжуулан хиймэл дагуулд шууд холбогдон, мессеж, дуудлага болон өгөгдөл илгээх боломжтой болох шинэ технологи юм.
