Европын хэрэглэгчдэд гэнэтийн асуудал: AirPods Pro 3-ийн шууд орчуулга ажиллахгүй

Apple энэ долоо хоногт шинэ бүтээгдэхүүнүүдээ танилцуулсан. Тэдгээрийн дунд iPhone 17 цуврал, iPhone Air болон AirPods Pro 3 багтсан бөгөөд AirPods-ийн хамгийн том шинэчлэл нь Live Translation буюу шууд орчуулгын функц байлаа. Энэхүү функц нь iOS 26 үйлдлийн системтэй iPhone дээр ажиллах бөгөөд ойрын өдрүүдэд худалдаанд гарахаар төлөвлөгджээ.

Гэвч Европын Холбооны хэрэглэгчид томоохон хязгаарлалтад орсон байна. Apple-ийн албан ёсны мэдээллээр, хэрэв таны Apple ID Европын холбооны бүс нутагт бүртгэлтэй бол шууд орчуулгын функц ашиглах боломжгүй. Энэ нь шинэ AirPods Pro 3 болон AirPods 4-өө хүлээж байсан Европын холбооны хэрэглэгчдэд таагүй мэдээ болж байна.

Одоогоор дэмжиж буй хэлнүүд:

• Англи (АНУ, Их Британи)
• Франц
• Герман
• Португал (Бразил)
• Испани

2025 оны эцэс гэхэд итали, япон, солонгос болон хялбаршуулсан хятад хэл нэмэгдэхээр байгаа ч Европын хэрэглэгчдэд хэзээ нээлттэй болох нь тодорхойгүй хэвээр байна.

Шууд орчуулгын боломжгүй байгаа ч AirPods Pro 3 бусад тал дээрээ давуу талыг санал болгож байна. Үүнд:

• шинэчлэгдсэн идэвхтэй дуу чимээ дарах систем,
• илүү авсаархан дизайн,
• батарейны ашиглалтын хугацааны өсөлт,
• зүрхний цохилт хэмжигч мэдрэгч оржээ.