Хүн дүрст роботыг дэлхий нийтийн орлогын түлхүүр гэж харж байна
Америкийн нэртэй бизнес эрхлэгч, SpaceX болон Tesla компанийн үүсгэн байгуулагч Элoн Маск X нийгмийн сүлжээндээ хүн дүрст робот Optimus-ийн талаар дахин дуугарч, түүнийг энгийн үйлдвэрийн төхөөрөмж бус, ядуурлыг бууруулах, цаашлаад бүр “устгах” хэмжээнд нөлөөлж чадах хөгжүүлэлт гэж тодорхойлов. Түүний тайлбарласнаар, хэрэв Optimus төслийг бүрэн хэрэгжүүлж, өргөн хэрэглээнд нэвтрүүлж чадвал дэлхийн олон оронд бүх нийтийн өндөр орлогын тогтолцоонд шилжих боломж нээгдэх юм.
Маск ийнхүү бичихдээ энэ бол зүгээр нэг романтик ирээдүйн төсөөлөл биш, харин робот, хиймэл оюун ухаан, автоматжуулалтын ачаар хүмүүсийн хийдэг олон ажлыг машин гүйцэтгэж, харин хүний хөдөлмөрийг илүү бүтээлч, оюуны чиглэлд шилжүүлэх суурь болно гэж үзэж байгаагаа илэрхийлжээ. Түүний логикоор бол үйлдвэрлэл, үйлчилгээний маш олон салбарт Optimus робот нэвтэрснээр хүний хөдөлмөрөөс бий болох дарамт, эрсдэл буурч, орлогын шинэ загварууд үүсэх нөхцөл бүрдэх юм.
“Optimus хамгийн туршлагатай мэс засалчаас илүү нарийвчлалтай, үр дүнтэй ажиллах болно”
Маск X дээрх нийтлэлдээ 11-р сарын 6-нд Tesla-ийн хөрөнгө оруулагчдад хэлсэн үгээсээ эш татсан бөгөөд энэ үеэрээ Optimus-ийн ирээдүйн боломжийн талаар маш шууд үг хэлсэн байдаг. Тэр:
“Optimus хамгийн туршлагатай мэс засалчаас илүү нарийвчлалтай, үр дүнтэй ажиллах болно”
хэмээн мэдэгдэж, робот хүний гар хүрэх хамгийн эмзэг, өндөр ур чадвар шаардсан салбар руу ч орж чадна гэж онцолсон. Ингэснээр тэр Optimus-ийг зөвхөн агуулах, үйлдвэр, энгийн давтан хөдөлгөөнтэй ажилд биш, харин анагаах ухаан, өндөр нарийвчлалтай мэс засал, эрсдэлтэй орчинд хүний оролцоог багасгах үүрэгтэй гол тоглогч болгох зорилготой байгааг нуусангүй.
Ийм мэдэгдэл нь нэг талаар шүүмжлэл, нөгөө талаар гайхшрал, бас багагүй эмээлийг дагуулж байгаа. Учир нь мэс засалч, эмч мэргэжил бол өнөөдрийг хүртэл хүний шийдвэр, сэтгэл хөдлөл, ёс зүйн хариуцлагад тулгуурласан хамгийн “хүн төвтэй” салбарын нэгээр тооцогдсоор ирсэн билээ.
Холливудын улаан хивсэн дээр гарч ирсэн робот
Optimus робот олон нийтийн өмнө анх энгийн танилцуулга, лабораторийн үзүүлбэрээр бус, шууд л Холливудын улаан хивсэн дээр гарч ирсэн нь бас нэг сонирхолтой деталь юм. 10-р сард болсон “Tron: Ares” киноны нээлтийн үеэр Optimus улаан хивсэн дээр гарч, жүжигчин Жаред Летог даган кунг фуг санагдуулам хэд хэдэн хөдөлгөөн хийж үзүүлсэн нь хэвлэл, олон нийтийн сүлжээнд багагүй шуугиан тарьсан.
Ингэснээр Tesla-ийн хүн дүрст робот нь зөвхөн инженер, технологийн хүрээнд яригдах төслийн хэмжээнээс хальж, шууд л поп соёлын хэсэг болон хувирч байна. Маскийн хувьд ч Optimus-ийг “ирээдүйн ажилчин” төдийгүй, олон нийтэд танигдсан брэнд, дүр төрх болгож, хүлээн зөвшөөрөлтийг түргэтгэх нь чухал алхам гэж үзэж буй бололтой.
Tesla Bot–ийн гарал үүсэл ба хөгжлийн товч түүх
Optimus буюу Tesla Bot төслийг албан ёсоор 2024 оны 10-р сард танилцуулсан ч Маск хүн дүрст робот бүтээх тухай санаагаа үүнээс даруй гурван жилийн өмнө, 2021 онд анх олны өмнө ярьж байсан. Тухайн үедээ тэр роботуудыг хамгийн түрүүнд Tesla-ийн үйлдвэр, агуулах, дотоод логистик, аюултай, давтамж өндөртэй ажлуудыг хийхэд ашиглана гэж тайлбарлаж байсан бол өдгөө энэ төсөл нэгэнт зөвхөн дотоод хэрэгцээнээс хальж, илүү өргөн зах зээлийн зорилготой болж хувирчээ.
Маскийн тооцоолсноор Optimus роботын үнэ 20 000–30 000 ам.долларын хооронд байх боломжтой. Хэрэв үнэхээр ийм түвшинд тогтвол зарим дундаж ангиллын автомашинтай дүйцэх үнэ бөгөөд тодорхой хугацааны дараа өрхийн түвшинд ч робот худалдан авах боломжтой болно гэсэн үг юм. Тэр өөрийн хэвшмэл хэв маягаараа хийх тооцоо, төсөөллөө “хэт өөдрөг биш, харин хэрэгжихүйц” гэж тодорхойлдог.
“Optimus Теслаг автомашинаас ч том бизнес болгож магадгүй”
Элон Маск Tesla-гийн ирээдүйн тухай ярих болгондоо машины бизнесийг цорын ганц, гол тулгуур гэж үзэхээ больсныг ил тод харуулж байна. Хүн дүрст роботын тухай дурдсандаа тэр дахин нэг удаа энэ төслийн стратегийн ач холбогдлыг онцолж, цаг хугацаа өнгөрөхийн хэрээр Optimus нь Tesla компанийн хувьд автомашины бизнесээс ч илүү чухал чиглэл болж хувирч магадгүй гэж хэлжээ.
Энэ нь Теслаг зөвхөн цахилгаан машин үйлдвэрлэдэг компани биш, харин өргөн хүрээтэй технологийн экосистем – хиймэл оюун, робот техник, эрчим хүч, автоматжуулалт, программ хангамжийн нэгдэл гэж харах ёстой гэсэн Маскийн удаан ярьж ирсэн концепцийн үргэлжлэл юм. Хэрэв Optimus бодит амьдрал дээр Маскийн хэлж буй түвшинд хүрч чадвал, зөвхөн нэг компанийн бизнесийн бүтэц өөрчлөгдөхөөс гадна хөдөлмөрийн зах зээл, нийгмийн халамж, орлогын тогтолцоог бүхэлд нь дахин бодож үзэх шаардлага бий болно.
Яг одоо бол түүний амлалт, зорилго, ирээдүйн төсөөлөл зураг дээр, тайзан дээр, улаан хивсэн дээр, X-ийн пост дээр л харагдаж байна. Харин робот үнэхээр “хамгийн туршлагатай мэс засалчаас илүү нарийвчлалтай, үр дүнтэй” ажиллах тэр өдөр ирэх эсэхийг технологи, ёс зүй, нийгмийн бэлэн байдал гурвуул зэрэг шахаж мэдэх л болно.
