Олон улсын судлаачдын баг ирээдүйн сансар судлалын төслүүдэд ашиглах Ангараг болон Сарны гүнд бууж, агуй судлах чадвартай роботуудыг амжилттай туршжээ.
Туршилтын талбар – Ланзароте арал
Шинэ робот системийг Испанийн Ланзароте арал дээр туршихдаа:
- Нэг робот нь гадаргуу дээр үлдэж, нөгөө роверийг доош буухад тусалсан,
- Жижиг ровер нь лаавын агуй руу бууж, том роверийн холбоотой хэвээр ажилласан байна.
Эрдэмтэд энэ аргаар ирээдүйд Ангараг болон Сарны гүнд нэвтрэх боломжтойг харуулжээ.
Лаавын хонгилын ач холбогдол
Галт уулын дэлбэрэлтээс үүсдэг “лаавын хонгилууд” нь хөрсөн дор хоосон суваг үлдээдэг. Хиймэл дагуулын ажиглалтаар ийм бүтэц Ангараг болон Сарны гадаргуун дор олон бий нь тогтоогдсон.
Эдгээр хонгилууд нь:
- Ирээдүйн шинжлэх ухааны судалгаанд чухал суурь болох,
- Анхны сансрын нисэгчид болон колоничдыг сансрын туяа, нарны цацраг, микро солироос хамгаалах байгалийн орчин болж чадах юм.
Роботын стратеги
Испанийн Малага их сургуулийн роботын судлаач Карлос Перес-дель-Пулгарын баг туршилтаа дараах дөрвөн үе шаттайгаар хэрэгжүүлжээ:
- Хоёр ровер агуйн үүд орчимд гадаргуугийн зураглал хийсэн.
- Нэг ровероос жижиг “кубсат” төрлийн мэдрэгчийг салгаж, агуйн үүдийг гурван хэмжээстээр дүрсэлсэн.
- Роверууд энэ мэдээллийг ашиглан хамгийн оновчтой буух замыг тооцоолжээ.
- Жижиг ровер том роверийн тусламжтай доош бууж, дараа нь салан 235 метрийн гүнд аялж, хонгилын нарийвчилсан 3D газрын зураг бүтээсэн.
Тулгамдаж буй сорилт
Эрдэмтдийн онцолсноор хамгийн том хүндрэл бол харилцаа холбоо. Радио долгион хад чулуугаар дамждаггүй учир ирээдүйд томоохон хонгилын системийг судлахын тулд найдвартай холбооны технологи хөгжүүлэх шаардлагатай гэнэ.
