Etherdyne: Жинхэнэ утасгүй тэжээлийн эрин үе эхэллээ – бүх төхөөрөмжийг нэг дор тэжээж буй сэтгэл хөдөлгөм демо бичлэг цацагдлаа

YouTube-ийн DIY Perks сувгийн Метью Перкс болон Etherdyne Technologies стартап хамтран жинхэнэ утасгүй тэжээл бүхий технологийг амжилттай туршиж, сонирхолтой туршилтын бичлэгийг нийтэллээ. Энэхүү систем нь ширээн дээрх бүх төхөөрөмжийг ямар ч холболтын утасгүйгээр 100 Вт хүртэл хүчдэлээр 1 метрийн радиуст тэжээж чаддаг нь технологийн салбарт эргэлт хийж болзошгүйг харуулж байна.

Туршилтад утасгүй хулгана, гар, микрофон, стерео чанга яригч, 24 инчийн дэлгэц болон халаалттай аяга зэрэг төхөөрөмжүүд бүгд холбогч утасгүй, зайгүй ажиллаж байсан нь энэ технологийн хүчин чадлыг баталсан. Перкс эдгээр төхөөрөмжүүдийн батарейг бүрмөсөн авч, Etherdyne-ийн хүлээн авагчтай сольсноор утасгүй тэжээлд бүрэн найдаж ажиллуулсан юм.

Etherdyne-ийн “Wire-Free Power Zone” хэмээх систем нь 6.78 МГц-ийн дамжуулалтын давтамжтай, ухаалаг хүлээн авагчдын тусламжтайгаар төхөөрөмжийг нарийн тохируулалтгүйгээр шууд тэжээх боломжийг олгож байгаа нь өмнөх утасгүй цэнэглэгчдээс эрс ялгарч буй юм. Харин уламжлалт Qi технологи нь ердөө 15 Вт хүртэл хүчдэл гаргаж, маш ойр зайнд (бараг хүрэх шахам) ажилладаг билээ.

Мөн DIY инженер Перкс өөрөө 3D принтерээр утасгүй тэжээлтэй стерео чанга яригч, микрофон, аяга зэргийг өөрийн гараар хийсэн нь энэхүү системийн хэрэглээний уян хатан, DIY нөхцөлд тохиромжтой байдал, бодит хэрэглээнд нийцтэйг харуулсан.

Түүнчлэн, 24 инчийн дэлгэцэд тусгай 14 Вт-ын хоёр тэжээлийн гогцоо, HDMI хүлээн авагч суурилуулснаар тэрхүү дэлгэцийг бүрэн утасгүй болгож чаджээ. Энэ нь оффис, студи зэрэг орчинд утасгүй орчныг бүрэн бүрдүүлэхэд ойртож байгааг илтгэж байна.

Одоогоор энэхүү технологи нь бүх нийтийн хэрэглээнд нэвтрээгүй байгаа ч Etherdyne компани туршилтын багц захиалах боломжийг олгож байгаа аж. Эрүүл мэндэд үзүүлэх сөрөг нөлөөллийн талаар болгоомжлол байсаар байгаа ч Etherdyne-ийн зүгээс FCC ба CE стандартын баталгаажуулалттай гэдгээ онцолжээ.