Нууцлалын дэлгэц шинэ түвшний хамгаалалт санал болгож байгаа ч дүрсний чанарт сөргөөр нөлөөлж байна
Samsung Galaxy S26 Ultra нь хүчирхэг флагман ангиллын ухаалаг утас хэвээр байгаа ч өмнөх Galaxy S25 Ultra-тай харьцуулахад өөрчлөлт төдийлөн их биш гэж үнэлэгдэж байна. Шинэчлэлийн гол цөм нь Galaxy төхөөрөмжүүдэд зориулан оновчлуулсан Snapdragon 8 Elite Gen 5 процессор болсон ч технологийн хүрээний хамгийн их анхаарал татаж буй зүйл нь өөр нэг боломж юм. Тэр нь дэлгэцийн нууцлалын горим.
Гаднын хүний хараанаас дэлгэцийг хамгаалах шийдэл өмнө нь ч байсан. Гэхдээ ихэвчлэн энэ нь нэмэлт хамгаалалтын шил зэрэг дагалдах хэрэгслээр хэрэгждэг байв. Харин Galaxy S26 Ultra дээр энэ боломжийг шууд дэлгэцэнд нь суурилуулсан нь онцлог болжээ. Ингэснээр хэрэглэгч хүссэн үедээ энэ функцийг асааж, унтраахаас гадна зөвхөн тодорхой аппликэйшн, бүр интерфэйсийн зарим хэсэгт ч тохируулах боломжтой болсон байна. Жишээлбэл, зөвхөн мэдэгдлүүдийг бусдад харагдахгүй болгох сонголт хүртэл өгчээ.
Гэвч энэ шинэлэг шийдэл нь сул талгүй биш байна. Нууцлалын горимыг идэвхжүүлэх үед дүрсний чанарт мэдэгдэхүйц өөрчлөлт орж, тод байдал болон хурц чанар нь тодорхой өнцгөөс харахад мууддаг аж. Түүнээс гадна энэ горим унтраалттай байсан ч S26 Ultra-ийн дэлгэц бусад Samsung утас, тэр дундаа Galaxy S25 Ultra-тай харьцуулахад бага зэрэг бүдэг харагдаж байгааг ажиглагчид онцолж байна.
Samsung-ийн шинэ дэлгэцийн шийдэл хэрхэн ажилладаг, яагаад сөрөг нөлөө дагуулж байгаа вэ
Ердийн нөхцөлд ухаалаг утасны дэлгэц дээр дүрс харагдах үед пиксел бүр гэрлийг өргөн өнцгөөр тараадаг тул олон талаас харахад тод харагддаг. Харин S26 Ultra-ийн нууцлалын горим нь энэ зарчмыг техник хангамжийн түвшинд өөрчилдөг байна. Дэлгэц нь өргөн өнцгөөр харагддаг стандарт пиксел болон гэрлийг зөвхөн шууд чиглэлд цацдаг тусгай пиксел гэсэн хоёр төрлийн пиксел ашигладаг аж. Нууцлалын горимыг идэвхжүүлэх үед өргөн өнцгийн пикселүүдийг унтрааж, зөвхөн чиглүүлсэн гэрэлтэй пикселүүдийг ажиллуулдаг байна.
Гэхдээ ийм бүтэц нь горим унтраалттай байсан ч сөрөг тал дагуулдаг. Нарийн өнцгөөр харагддаг пикселүүд дэлгэцийн нийт гэрэлтэлтэд нөлөөлж, янз бүрийн өнцгөөс харахад дэлгэц ерөнхийдөө бүдэг харагдах шалтгаан болдог аж. Өөрөөр хэлбэл, бүх пиксел ижил түвшинд гэрэл дамжуулахгүй байгаа нь нийт дүрсний чанарт нөлөөлж байна гэсэн үг.
Энэ нь мөн гялбаатай тэмцэх чадварт ч нөлөөлжээ. Энэ тал дээр S26 Ultra өмнөх загвараасаа сул болсон гэж үзэж байна. Учир нь хэрэв Samsung илүү хүчтэй anti-glare бүрхүүл ашигласан бол дэлгэцийн гэрэлтэлт бүр ч их буурах эрсдэлтэй байсан байна. Аль хэдийн дэлгэцийн хийцээс шалтгаалсан ийм хязгаарлалттай нөхцөлд компани илүү түрэмгий бүрхүүл хэрэглэхээс татгалзсан бололтой.
Samsung энэ асуудалд тайлбар өгөхдөө нууцлалын дэлгэц нь хэрэглэгчийн мэдээллийг хамгаалах зорилготой бөгөөд энгийн хэрэглээний үед аль болох тав тухтай харагдахаар боловсруулагдсан гэж мэдэгджээ. Компанийн зүгээс тодорхой өнцгөөс харах үед эсвэл хамгийн өндөр гэрэлтэлт дээр зарим өөрчлөлт мэдрэгдэж болохыг хүлээн зөвшөөрсөн ч бодит өдөр тутмын хэрэглээнд энэ нөлөө ихэнх хэрэглэгчид дээр бараг анзаарагдахгүй гэж тайлбарласан байна.
Ингэснээр Samsung өөрийн Privacy Display технологи нь дэлгэцийн дүрслэлд нөлөөлдөг гэдгийг шууд үгүйсгээгүй ч энэ өөрчлөлт олон хүнд шийдвэрлэх хэмжээний асуудал болохгүй гэж үзэж байна. Практик туршилтуудаар ч ялгаа нь өмнөх загваруудтай зэрэгцүүлж тавьсан үед л илүү тод мэдрэгдэж байгаа аж. Гэсэн ч хэрэв хэрэглэгч дэлгэцийн чанарыг нэн тэргүүнд тавьдаг бөгөөд нууцлалын функц тийм ч чухал биш бол S26 Ultra-ийн үнэтэй ойролцоо ангилалд илүү сайн дэлгэцтэй өөр сонголтууд зах зээл дээр байгаа гэдгийг шинжээчид онцолж байна.
