АНУ-ын Inversion компани ачааг дэлхийн хаана ч, ердөө нэг цагийн дотор хүргэх боломжтой шинэ төрлийн Arc сансрын хөлөг-өө танилцууллаа. Энэхүү төслийн зорилго нь цэргийн болон онцгой нөхцөлд шаардлагатай зүйлсийг түргэн шуурхай хүргэхэд оршиж байна.
Inversion-ийн санаачилга
2021 онд Бостоны их сургуулийн оюутнууд Жастин Фиашетти, Остин Бриггс нарын үүсгэн байгуулсан Inversion компани өнөөдөр 25 гаруй ажилтантайгаар өндөр технологийн шинэчлэл бүтээж байна. Тэдний хөгжүүлж буй Arc нь 225 кг хүртэлх ачааг дэлхийн хаана ч буулгах чадвартай.
Фиашеттигийн хэлснээр:
“Бидний эрхэм зорилго бол Arcs тээврийн хэрэгслийг тойрог замд урьдчилан байршуулж, тэнд таван жил хүртэл хадгалж, шаардлагатай мөчид дуудлагаар буулгаж, зөв газарт газардуулах юм. Сансрын эдийн засгийн үнэт зүйл бол дэлхийд нэвтрэх чадвар.”
Туршилт ба хөгжүүлэлт
- Ray туршилтын загвар: 90 кг жинтэй жижиг сансрын хөлгийг угсарч, SpaceX Transporter-12 даалгаврын хүрээнд тойрог замд хөөргөжээ. Тус төхөөрөмж амжилттайгаар хөөрч, бууж, Inversion-ийн төвтэй холбоо тогтоосон.
- Arc-ийн хэмжээ: өргөн 1.2 м, өндөр 2.4 м. 2026 оны эцэс гэхэд бүрэн хэмжээний загвар бэлэн болох төлөвтэй.
- Маневрлах чадвар: Агаар мандалд нэвтрэх үед 1000 км-ийн радиуст маневр хийх боломжтой.
Газардалт ба аюулгүй байдал
Arc нь нисэх зурвас шаардалгүй, шүхэр ашиглан газардах бөгөөд хөдөлгүүрийн системд хоргүй түлш ашигладаг тул газардах даруйд хамгаалалтын хэрэгсэлгүйгээр хөлөгт ойртож болно.
Боломжит хэрэглээ
Arc-ийн хэрэглээ өргөн хүрээтэй. Энэ нь:
- Онцгой байдлын үед эмнэлгийн хэрэгсэл хүргэх
- Цэргийн зориулалтаар тулалдааны нөхцөлд хангамж хүргэх
- Нисгэгчгүй онгоц болон бусад чухал тоног төхөөрөмж буулгах боломжтой.
Одоогоор Inversion компани Arc-ийн үйлдвэрлэлийн цогцолбороо байгуулж, анхны бүрэн хэмжээний төхөөрөмжийг угсрах ажилдаа оржээ.
