Классик RPG тоглоомын дахин төрөлт тун амжилттай эхэлж байна. Gothic 1 Remake тоглоомыг Steam платформ дээр 1 сая гаруй тоглогч хүслийн жагсаалтдаа нэмсэн бөгөөд ингэснээр тэргүүлэгч хүсэмжит тоглоомуудын жагсаалтын 21-р байрт бичигдэж эхэлжээ.
Хөгжүүлэлтийг хариуцаж буй Alkimia Interactive студи болон нийтлэгч THQ Nordic тоглогчдоос ирж буй дэмжлэгт талархаж буйгаа илэрхийлж, анхны хувилбарын нэр хүндэд нийцсэн чанартай шинэчилсэн хувилбар бүтээхээ амласан байна.
Тоглоомын бүтээл хэдийн хэд хэдэн жил үргэлжилж буй бөгөөд 2025 оны хоёрдугаар сард болсон Steam Next Fest арга хэмжээний үеэр “Nyras Prologue” нэртэй демо хувилбар анх гарсан. Уг демо нь тусгайлан шинэчлэгдсэн ертөнцөд тоглогчдыг урин оруулж, шинэ тулааны систем, крафтинг, NPC-тай харилцах боломж, орчныг судлах зэрэг үндсэн механикуудад хэрэглэгчдийг танилцуулсан. Энэхүү демо нь үндсэн тоглоомын үйл явдлыг шууд илчлэхгүй ч Gothic ертөнцийн уур амьсгал, тоглох хэмнэлийг бодитоор мэдрүүлэх зорилготой бүтээгдсэн.
Тоглогчдын зүгээс 15 мянгаас давсан санал, шүүмж ирсний дараа хөгжүүлэгчид демог шинэчилж, дүрийн хөдөлгөөний анимац, тулааны хариу үйлдэл, эд зүйлс цуглуулах системийг сайжруулж, зарим алдаануудыг засжээ. Хөдөлгөөн илүү жигд, тулаан илүү ойлгомжтой, нарийн мэдрэгддэг болсон нь шүүмжлэгчдээс өндөр үнэлгээ авсан байна.
Gothic 1 Remake бүрэн хувилбар PC, PlayStation 5 болон Xbox Series X|S платформд зориулан боловсруулагдаж байгаа бөгөөд гаргах албан ёсны огноог хараахан зарлаагүй байна. THQ Nordic-ийн мэдэгдэж буйгаар, тоглоом зөвхөн “чанар нь хангагдсан” үедээ л худалдаанд гарна хэмээн тодотгожээ.
Энэ бүхний зэрэгцээ, Gothic болон Risen тоглоомын анхны бүтээгчид Piranha Bytes студийн хаалгаа барьсны дараа Pithead Studio нэртэйгээр шинэ инди төслөө зарласан бөгөөд тэд Arx Fatalis-той төстэй тоглоом бүтээж эхлээд байна.
