Тяньжин дахь туршилтаар 100 км/ц-ээс давж, нэг цагаас илүү нисжээ
Хятадын эрдэмтэд хулсны нийлмэл материалаар хийсэн хатуу далавчтай дроныг амжилттай туршиж, байгальд ээлтэй, өртөг багатай нисэх төхөөрөмжийн хөгжүүлэлтэд шинэ чиглэл нээсэн талаар мэдээлэв. Тяньжин хотод хийсэн туршилтын нислэгийн үеэр уг төхөөрөмж 100 км/ц-ээс дээш хурдалж, нэг цагаас илүү хугацаанд агаарт тогтсон байна. Энэ нь зөвхөн нислэгийн үр ашиг төдийгүй үйлдвэрлэлийн зардлыг бууруулах боломжийг харуулсан гэж дурджээ.
Дроныг Олон улсын хулс, ротангийн төв, Бэйхан их сургуулийн дэргэдэх Нинбогийн Инновацийн судалгааны хүрээлэн, мөн Long Bamboo Technology Group хамтран бүтээсэн байна. Төхөөрөмжийн далавчны дэлгээс 2.5 метр, жин нь ойролцоогоор 7 кг аж. Хөгжүүлэгчдийн мэдээлснээр хулсны нийлмэл материал ашигласнаар хийц 20%-иар хөнгөн болж, материалын өртөг уламжлалт нүүрстөрөгчийн ширхэгт материал ашигладаг дроноос 20%-иас дээш хэмжээгээр хямдарсан байна.
Карбон материалын оронд хулс: өртөг, экологийн давуу талыг онцлов
Дрон бүтээлцэхэд түгээмэл хэрэглэгддэг карбон материал нь бат бөх боловч үйлдвэрлэл нь их эрчим хүч шаарддаг, мөн хаягдал боловсруулахад экологийн асуудал үүсгэдэг гэж тайлбарлажээ. Харин шинэ хулсны нийлмэл материал нь карбон даавууны үнийн дөрөвний нэгтэй тэнцэх түвшинд байгаа нь нийт хийцийн зардлыг мэдэгдэхүйц бууруулна гэж үзсэн байна.
Энэ төхөөрөмжийн хийцийн ойролцоогоор 25%-ийг хулсны нийлмэл материалаар үйлдвэрлэсэн бөгөөд их биеийн гадна бүрхүүл хүртэл багтжээ. Ийм хэмжээний хулсны нийлмэл материал ашигласан хатуу далавчтай дрон нь дэлхийд анхных гэж онцолсон байна.
“100 гаруй туршилт” хийж, авиацын стандартын шалгалтаар баталгаажуулжээ
Төслийн удирдагч Цин Даочун хөгжүүлэлт нь нарийн туршилт, үйлдвэрлэлийн процессын олон удаагийн сайжруулалт шаардсан гэж хэлжээ. Тэрээр “Дронд ашиглах хулсны нийлмэл материал нь зөвхөн механикийн хатуу шаардлагыг хангаад зогсохгүй, эд анги хэлбэржүүлэлт болон орчны нөхцөлд дасан зохицох зэрэг техникийн сорилтуудыг даван туулах ёстой” гэж онцолсон байна.
Материалын бат бөх чанар, хөшүүн байдал, хэлбэржих чадварыг шалгахын тулд авиацын стандартын дагуу 100-аас дээш туршилт хийсэн гэж мэдээлэв. Мөн хэвлэлд зориулсан танилцуулгын үеэр Цин эцсийн хувилбарын хулсны нийлмэл материал нь өндөр бат бөх, удаан эдэлгээтэй, хэлбэржүүлэхэд тохиромжтой бөгөөд авиацын шаардлагуудыг хангаж байгаа гэж мэдэгдсэн байна. Туршилтын нислэгүүд ч механикийн бат бэх, уян харимхайн модуль, ачаалал даах чадвар, нислэгийн тогтвортой байдлын шалгуурыг хангаж буйг баталсан гэж дурджээ.
Логистик, хөдөө аж ахуй, байгаль орчны мониторингийн платформ болгохоор төлөвлөжээ
Хөгжүүлэгчдийн баг уг дроныг Хятадын “бага өндөрт ашиглах” салбарт өргөн хэрэглээний платформ болгохоор харж байна. Үүнд логистик, хөдөө аж ахуй, байгаль орчны мониторинг зэрэг чиглэлүүд багтжээ. Long Bamboo Technology Group-ийн тэргүүн Лян Цзяньчан компанийнхаа гол зорилгыг хөнгөн жин, экологийн давуу тал, биологийн задралтай шинжид төвлөрүүлнэ гэж мэдэгдсэн байна. Тэрээр цаашлаад шинэ эрчим хүчний тээвэр, далайн тоног төхөөрөмж болон хөнгөн, байгальд ээлтэй материал чухал бусад салбарт ашиглалт тэлнэ гэж тооцоолжээ.
