Хятадын эрдэмтэд цахилгааны оронд гэрэл ашиглан тооцоолол хийх компьютерийн чип бүтээсэн байна. Энэ шинэ чип нь гайхалтай хурдтай бөгөөд үр дүнтэй гэдгийг туршилтаар баталсан байна. Шанхайн оптик, нарийн механикийн хүрээлэнгийн эрдэмтэд бүтээсэн энэ чип нь секундэд 50 тэрбум эргэлттэй гэрэл ашиглан 2.560 их наяд үйлдлийг хийж чаддаг. Улмаар энэ нь “NVIDIA” компанийн хамгийн хүчирхэг чипүүдтэй эн тэнцэх болсон гэж мэдэгдсэн байна.
Уламжлалт чип нь цахилгаан эрчим хүч ашиглан мэдээллийг боловсруулдаг бол Хятадын шинэ чип нь гэрлийн долгион, тэр дундаа 100 гаруй өөр гэрлийн долгионы уртыг нэгэн зэрэг ашиглаж ажилладаг. Жишээлбэл, 100 өөр гэрлийн цацраг дээр нэгэн зэрэг 100 мессеж ирж, илгээж байгаатай адилтай. Энэ технологи нь асар их хэмжээний өгөгдлийг нэгэн зэрэг боловсруулж чадна.
Эрдэмтдийн нэг Хан Шилин энэ явдлыг “Энэ нь нэг эгнээтэй замыг 100 эгнээтэй супер хурдны зам болгохтой адил” гэж тайлбарлажээ.
Энэхүү гэрлийн эрчим хүчээр ажилладаг чипийг ашигласнаар хурдтай, их өгөгдлийг нэгэн зэрэг боловсруулах давуу талтай болсноос гадна эрчим хүчний хэрэглээ, дулаан ялгаруулалт багатай, байгальд ээлтэй байдлаар ажиллана. Энэ чипийг хиймэл оюун ухаан, робот, дрон зохицуулалт, ухаалаг мэдээллийн төв зэрэг ирээдүйн технологиудад ашиглах боломжтой гэж эрдэмтэд үзэж байна. Чипийн бүрэн судалгааг “eLight” сэтгүүлд “100 долгионы урттай мультиплекс хийх чадвартай параллель оптик тооцоолол” хэмээх гарчигтайгаар нийтэлжээ.
