2025 оны наймдугаар сарын 1-ний өдрөөс эхлэн “Counter-Strike” тоглоомын хамгийн нэр хүндтэй тэмцээнүүдийн нэг болох IEM Cologne 2025-ийн финалын шат албан ёсоор эхэлж байна. Герман улсын Кёльн хотын зүрхэнд сүндэрлэсэн LANXESS арена дахин нэг удаа дэлхийн шилдгүүдийн ур чадвар, тэмцлийн гал цогийг гэрчлэхээр бэлтгэгджээ.
IEM Cologne нь 2014 оноос хойш жил бүр зохион байгуулагдаж ирсэн бөгөөд энэ хугацаанд мянга мянган фенүүдийн дурсамж, цахим спортын түүхэнд мөнхөрсөн олон агшин энд төрсөн билээ. LANXESS арена нь “CS-ийн сүм” хэмээн нэрлэгддэг нь ч учиртай — фенүүдийн цогтой дэмжлэг, амьсгаа даран хүлээдэг мөчүүд энэ газарт тогтсон билээ.
Энэ жилийн тэмцээн долдугаар сарын 23-наас наймдугаар сарын 3-ныг хүртэл үргэлжлэх бөгөөд нийт 24 шилдэг баг 1.25 сая ам.долларын шагналын сантай өрсөлдөж байна. Эдгээрээс шалгарсан 6 баг финалын шатанд тулах эрхээ авсан бөгөөд тэд наймдугаар сарын 1-3-ны хооронд LANXESS аренаг дүүргэсэн олон мянган үзэгчдийн өмнө аваргын төлөөх ширүүн тулаанд орох юм.
Мөн энэ жил ESL-ийн 25 жилийн ой тохиож буйгаараа онцлог. Цахим спортын хөгжлийг хоёр бүтэн арван жил удирдан манлайлж, дэлхий нийтийн сонирхлыг татсан олон арга хэмжээг амжилттай зохион байгуулсаар ирсэн ESL-ийн түүхэн ойн хүрээнд энэ тэмцээн илүү өргөн цар хүрээтэй болжээ.
Финалын шатанд шалгарсан багууд:
- The MongolZ (Монгол)
- NaVi
- MOUZ
- FURIA
- Spirit
- Vitality
Плей-оффын тоглолтуудын тасалбар бүгд зарагдаж дууссан нь энэ арга хэмжээний нэр хүнд, хүлээлтийн түвшинг тодорхой харуулж байна. Хэдхэн хоногийн дараа IEM Cologne 2025-ийн аварга тодрох бөгөөд энэ удаагийн тоглолтууд дахин олон гайхамшигт түүх, шинэ домог төрүүлэх нь гарцаагүй.
