Apple-ийн iOS 26 шинэчлэлт олон шинэ функц, сайжруулалтыг авчирсан ч Android-ийн уян хатан байдлын түвшинд хараахан хүрээгүй байна. Android утаснууд олон жилийн турш хэрэглэгчдэд илүү гүнзгий хяналт, тохируулгын эрх олгосоор ирсэн. Харин iPhone хэрэглэгчдэд одоо ч байхгүй таван гол боломжийг энд онцолж байна.
1. Урвуу утасгүй цэнэглэх боломж
Android хэрэглэгчид утсаа утасгүй цэнэглэгч болгон ашиглаж чаддаг. Жишээ нь, Samsung-ийн “Wireless PowerShare” болон Google Pixel-ийн “Battery Share” функц нь чихэвч, ухаалаг цаг, бүр өөр утсыг хүртэл цэнэглэх боломжийг олгодог. Харин Apple энэ функцийн талаар олон цуурхал гаргасан ч iPhone 17 Pro Max-д ч нэвтрүүлээгүй хэвээр байна.
2. Өргөтгөх боломжтой хадгалах сан
Олон Android утас microSD карт дэмждэг бөгөөд энэ нь хэрэглэгчдэд санах ойн хэмжээг хэд дахин нэмэгдүүлэх уян хатан байдал өгдөг. Харин iPhone хэрэглэгчид хадгалах сан дүүрмэгц файлуудыг устгах, iCloud руу шилжүүлэх эсвэл илүү үнэтэй шинэ загвар худалдаж авах шаардлагатай болдог.
3. Pro камерын нарийн тохиргоо
Android төхөөрөмжүүд, тухайлбал Samsung Galaxy S Ultra, Google Pixel гэх мэт, мэргэжлийн горимтой бөгөөд ISO, хөшигний хурд, цагаан баланс зэрэг параметрүүдийг гараар тохируулах боломжийг олгодог. Харин iPhone автомат горимдоо сайн ч мэргэжлийн зураг авалтад хязгаарлагдмал хэвээр. Илүү нарийн тохиргоо хийхийг хүсвэл Halide зэрэг гуравдагч талын апп хэрэглэх шаардлагатай.
4. Програм хуулбарлах буюу Dual Apps
Android-ийн “Dual Apps” функц нь хэрэглэгчдэд нэг програмыг хоёр данснаас зэрэг ашиглах боломж олгодог — жишээ нь хоёр өөр WhatsApp бүртгэл. iPhone-д энэ функц огт байдаггүй бөгөөд хэрэглэгчид гарах эсвэл вэб хувилбар руу шилжих шаардлагатай болдог.
5. Файлын нээлттэй хандалт
Android систем илүү нээлттэй файлын бүтэцтэй тул хэрэглэгчид төхөөрөмж дэх бүх фолдерт нэвтрэх, архив задлах, файлуудыг чөлөөтэй зөөх боломжтой. Харин iOS-ийн “Files” апп нь хязгаарлагдмал бөгөөд iCloud-т тулгуурладаг. Гуравдагч үүл хадгалах үйлчилгээ рүү хандах боломж хязгаарлагдмал хэвээр байна.
Хэдийгээр iOS 26 олон шинэлэг боломжуудыг авчирсан ч Android хэрэглэгчдийн хувьд хэвийн зүйл болсон эдгээр уян хатан шийдлүүдийг Apple одоогоор бүрэн хэрэгжүүлээгүй байна.
