Apple iOS 27 дээр “алдаа засвар”-ыг яагаад нэн түрүүнд тавьж эхлэв
Шинэчлэгдсэн Siri-ээс өөр дорвитой шинэ боломж цөөн байх магадлалтай гэх мэдээллийн дараа Bloomberg-ийн сэтгүүлч Марк Гурман Power On товхимолдоо Apple энэ удаа алдаа засвар, кодын цэвэрлэгээг тэргүүлэх чиглэл болгож байгааг онцолжээ. Үүний гол шалтгаан нь iPhone загваруудын батерейны ашиглалтын хугацааг сайжруулах боломж гэж тэр тайлбарласан байна.
Гурманы бичсэнээр хуучирсан кодыг арилгах, зарим функцийг дахин бичих, аппуудын ажиллагааг шинэчлэх зэрэг нь зөвхөн тогтвортой байдлыг нэмэхээс гадна шинэ болон хуучин iPhone-ууд дээр гүйцэтгэл илүү жигд болж, батерей удаан барихад хүртэл нөлөөлж болзошгүй.
Сүүлийн үеийн iPhone-ууд дээр (iPhone Air-ээс бусад) батерей “гол асуудал” гэх хэмжээнд яригдахгүй мэт харагддаг ч хэрэглэгчид шинэ iOS руу шилжихээс татгалзах шалтгааныхаа нэгээр батерей, гүйцэтгэлийн бууралтыг дурдах нь бий. Apple саяхан сүүлийн дөрвөн жилд худалдаж авсан бүх iPhone загваруудын 74 хувь нь iOS 26 дээр ажиллаж байгааг мэдээлсэн ч өмнөх жилүүдтэй харьцуулахад шинэчлэлийн хурд сул байгаа нь зарим хэрэглэгч “шинэ хувилбар суулгавал шинэ боломж өгдөггүй мөртлөө утсыг удаашруулдаг” гэсэн ойлголттой холбоотой байж болохыг нийтлэлүүдэд тэмдэглэжээ.
Гурман Apple батерейны өсөлтийг албан ёсоор томоор онцлох эсэх нь тодорхойгүй гэж бичсэн байна. Магадгүй хэрэглэгчид өөрсдөө “гэнэт илүү удаан барьж байна” гэдгийг мэдрэх хувилбар ч байж болно. Гэхдээ iOS 26 дээр хэрэглэгчийн интерфэйсийн том шинэчлэл хийгдсэний дараа кодыг цэвэрлэх нь дараагийн төхөөрөмжүүд дээр илүү жигд туршлага өгөх суурь болно гэсэн санаа энд давхар явж байна.
Эвхэгддэг iPhone, мэдрэгчтэй MacBook Pro-ийн өмнөх “цэвэрлэгээ”
Apple ойрын хугацаанд өмнө нь байгаагүй шинэ төрлийн хоёр төхөөрөмжийн талаар яригдаж байгаа нөхцөлд экосистемийн ажиллагааг алдаагүй, жигд байлгах шаардлага бүр ч өснө гэж энэ сэдвээр дүгнэжээ. Нэг нь мэдрэгчтэй дэлгэцтэй MacBook Pro, нөгөө нь эвхэгддэг iPhone гэж нэрлэгдэж буй төхөөрөмж. Эдгээр нь өндөр үнэ төлж авах хүмүүсийн хувьд програм хангамжийн алдаа хамгийн мэдрэмтгий асуудал болдог тул Apple “их шинэ функцээсээ илүү тогтвортой ажиллагаа”-г чухалчлах үндэслэлтэй гэж тайлбарласан байна.
Түүнчлэн Apple iOS–iPadOS, iPadOS–macOS-ийн туршлагыг илүү ойртуулах чиглэл рүү түлхэж магадгүй тухай таамаг гарсан. Учир нь iPhone болон Mac хоёр аль аль нь iPad-ын програм хангамжийн санаа, боломжуудаас илүү ихийг зээлж авах нөхцөл бүрдэхээр зураглал харагдаж байна.
Эвхэгддэг iPhone-ийн хувьд Split View зэрэг олон үйлдэл, эсвэл хавтанчилсан хэлбэрийн интерфэйс нэмэгдэх магадлалтай гэж бичжээ. Apple Pencil дэмжих тухай яриа ч гарч байгаа боловч үүнийг нотлох баттай мэдээлэл хараахан байхгүй гэж дурдсан. Харин мэдрэгчтэй Mac-ийн талд хэрэглэгчийн харилцан үйлчлэл илүү мэдрэгчид нийцсэн болох хэрэгцээ гарна. Үүнтэй холбоотойгоор Stage Manager-тэй төстэй, хэрэглэгчийн сонголтоор асааж унтрааж болдог хэлбэрийн шийдэл гарч ирж болзошгүй гэж таамагласан байна. Ямар хувилбар сонгосон ч дэлгэц дээрх элементүүдийн байрлал, харилцан үйлчлэлд их өөрчлөлт орох тул “алдаагүй програм” нь хэрэглэгчийн сэтгэл ханамжийн хамгийн том нөхцөл болно гэдгийг онцолжээ.
iOS 26 батерейг уртасгахгүй ч хэрэглээг илүү тод харуулдаг болсон
Нөгөө талд iOS 26 дээр батерейтай холбоотой хэд хэдэн шинэ боломж нэмэгдсэн ч эдгээр нь өөрөө батерейг шууд уртасгадаг шийдэл биш гэж тайлбарлагдсан. Харин хэрэглэгчийн мэдээлэл авах хэсэг илүү нарийвчилсан болсон байна. Тухайлбал батерейг 80 хувь хүртэл цэнэглэхэд ойролцоогоор хэр хугацаа шаардлагатайг харуулах боломж нэмэгдсэн. Мөн батерейны цэсэнд өнгөрсөн долоо хоногийн мөн өдөртэй харьцуулсан хэрэглээ, тодорхой апп дээр зарцуулсан хугацаа зэрэг илүү ойлгомжтой үзүүлэлтүүд орсноор хүмүүс өөрийн зуршил батерейнд хэрхэн нөлөөлдгийг өмнөхөөс илүү тод хардаг болжээ.
Мөн батерейны хугацааг уртасгахын тулд төхөөрөмжийн ажиллагааг автоматаар тохируулж өгдөг “Дасан зохицох” горим нэмэгдсэн гэж бичсэн байна. Энэ горим нь дэлгэцийн гэрлийг бууруулах, дэвсгэр шинэчлэлтийг хойшлуулах, мөн Бага эрчим хүчний горимыг 20 хувь дээр урьдчилан идэвхжүүлэх зэрэг тохиргоог хийж болзошгүй.
iOS 27 дээр батерейтай холбоотой яг ямар шинэ боломж нэмэгдэх нь одоогоор тодорхойгүй. Гэхдээ хэрэв хэрэглэгчид шинэ хувилбар суулгасныхаа дараа бодит сайжралтыг шууд мэдэрвэл энэ нь шинэчлэл хийх сонирхлыг өсгөхөөс гадна батерейны хугацаа богино гэж яригддаг iPhone Air зэрэг загваруудын эрэлтэд хүртэл нөлөөлж болзошгүй гэж нийтлэлд дурджээ.
