Ар талдаа дугуй AMOLED дэлгэцтэй өвөрмөц гэр
Dockcase компани iPhone 17 Pro болон iPhone 17 Pro Max загваруудад зориулсан Selfix нэртэй шинэ төрлийн гэрийг бэлдэж байгаа тухай мэдээлэл гарлаа. Тус дагалдах хэрэгсэл нь арын самбар дээрээ нэмэлт мэдрэгчтэй дэлгэцтэй гэдгээрээ онцлог. Дэлгэц нь 1.6 инч хэмжээтэй, 480×480 нягтралтай дугуй AMOLED панель байх аж.
Гол зорилго нь селфи, видео бичлэгийг илүү “зөв кадртай” болгох
Selfix-ийн үндсэн санаа нь хэрэглэгчийг урд камераас хараат биш болгох юм. Арын жижиг дэлгэцийн тусламжтайгаар 48 мегапикселийн үндсэн камераар зураг авахдаа кадраа шууд харж тохируулах боломжтой болох бөгөөд энэ нь чанарын хувьд урд камераас илүү давуу гэж тайлбарлажээ.
Үүний ачаар:
- өндөр чанартай селфи авах,
- хэт өргөн камераар бүлгийн зураг авахдаа хүрээгээ алдахгүй байх,
- зураг дарахаасаа өмнө байрлал, өнцөг, бүтэц зохиомжоо илүү нарийн тааруулах нөхцөл бүрдэх аж.
USB-C, microSD хүртэл багтсан нь жирийн гэрнээс тэс өөр
Энэ гэр зөвхөн дэлгэц нэмээд зогсохгүй “өргөтгөсөн боломж”-ууд багтаажээ. Тухайлбал PD 3.0 дэмждэг USB-C порттой бөгөөд 100 Вт хүртэл хүчин чадалтай байхаар дурдсан байна. Мөн дэлгэцийг тусад нь асаах зориулалттай товчлууртай, түүнчлэн 2 ТБ хүртэл багтаамжтай microSD картын оролттой гэнэ.
Санах ойн картыг зураг, видео контентыг iPhone-ийн сан руу шууд хадгалах зорилгоор ашиглаж болохоор төлөвлөгдөж байгаа нь “контент их хийдэг” хэрэглэгчдэд сонирхол татаж магадгүй.
Апп шаардахгүй, сааталгүй ажиллана гэж мэдэгджээ
Dockcase-ийн зүгээс энэ нэмэлт дэлгэц нь сааталгүй ажиллах бөгөөд тусдаа програм суулгах шаардлагагүй гэж онцолсон байна. Өөрөөр хэлбэл гэрээ залгахад л ажиллах “plug-and-play” хэлбэр рүү чиглэжээ.
Хэзээ худалдаанд гарах вэ, үнэ нь хэд вэ?
Selfix-ийг Kickstarter дээр борлуулж эхлүүлэхээр төлөвлөсөн ч үнэ нь одоогоор зарлагдаагүй байна. Харин өнгөний хувьд гурван сонголттой байхаар мэдээлсэн бөгөөд Ягаан, Цагаан овьёос, Хар өнгө гарна гэжээ.
