Шинэ iPhone-уудын танилцуулга албан ёсоор гарах хугацаа ойртож буй энэ үед iPhone 17 Pro болон Pro Max загваруудын тухай цоо шинэ мэдээллүүд цацагдсаар байна. MacRumors сайтад мэдээлэл өгсөн эх сурвалжийн хэлснээр Apple компани 8 дахин оптик томруулалт хийх чадвартай шинэ телефото линзийг энэхүү загварт суурилуулах гэж байгаа аж. Уг линз нь хөдөлгөөнт байх бөгөөд энэ нь хэрэглэгчдэд фокусын уртыг мэргэжлийн камертай адил чанараа алдалгүйгээр өөрчлөх боломжийг олгоно.
Камерын шинэ функцүүдийн нэг нь Apple-ийн хөгжүүлж буй мэргэжлийн түвшний зураг, видео бичлэгийн программ юм. Энэ нь Halide, Filmic Pro, Kino зэрэг өндөр зэрэглэлийн аппликейшнүүдтэй өрсөлдөхүйц бөгөөд хэрэглэгчдийн зураг авалтын боломжийг огцом нэмэгдүүлэх зорилготой. Програм зөвхөн iPhone 17 Pro-д зориулагдсан эсэх нь одоогоор тодорхойгүй байгаа ч түүний танилцуулгаас харахад энэхүү шинэчлэл нь Apple-ийн хувьд томоохон алхам байх бололтой.
Шинэ iPhone-ийн дээд хэсэгт камерын нэмэлт хяналтын товч байрлуулах төлөвлөгөөтэй байгаа нь зураг, видео бичлэгийн горимыг илүү хялбар, шуурхай эхлүүлэх боломжийг олгох юм. Энэ товчлуур нь өмнөх загваруудад орсон Action Button-ий сайжруулсан хувилбар байх хүлээлттэй байна.
Мөн эх сурвалжийн мэдээлснээр iPhone 17 Pro загвар нь зэс өнгийн шинэ хувилбартай байх ба Apple логог төхөөрөмжийн арын самбарын төв хэсэгт байрлуулах өөрчлөлт хийгдэхээр төлөвлөгдсөн байна. Камерын тохиргоонд гурван ширхэг 48 мегапикселийн мэдрэгч орж, видео зураг авалтын чанар илт сайжрах төлөвтэй.
Apple компанийн энэ жилийн маркетингийн стратеги нь блогчид болон контент бүтээгчдэд хандсан байж магадгүй байна. Энэ нь урд болон арын камераар нэгэн зэрэг бичлэг хийх боломжийг нэмснээр тодорхой болж байгаа юм. Уг боломж нь ярилцлага, нэвтрүүлэг, лайв контент хийхэд шинэ хэрэглээний хувилбарыг нээх боломжтой.
Шинэ загварын энэхүү дэвшил нь Apple компанийн технологийн дараагийн шат руу хийж буй чухал алхам болох бөгөөд iPhone 17 Pro нь зөвхөн хэрэглэгчдийн өдөр тутмын хэрэгцээг хангах биш, мэргэжлийн контент бүтээгчдийн ажлын гол хэрэгсэл болох боломжтойг харуулж байна.
