Ухаалаг гар утас хэрэглэгчдийн олонх нь зөвхөн GPS-ийг унтраавал байрлалаа хамгаалж чадна гэж боддог. Гэтэл бодит байдал дээр гар утас нь үүрэн цамхаг, Wi-Fi, Bluetooth болон бусад аргаар таны хөдөлгөөний мэдээллийг цуглуулсаар байдаг.
iPhone: “Чухал байршил” тохиргоо
Apple нь таны өдөр тутмын маршрутыг нарийн бүртгэдэг “Significant Locations” буюу “Чухал байршил” гэх далд функцтэй. Энэ нь Газрын зураг болон зөвлөмжийг сайжруулдаг ч таны хувийн профайлыг бүрдүүлдэг.
Устгах болон идэвхгүй болгох арга:
- Тохиргоо (Settings) → Нууцлал ба Аюулгүй байдал (Privacy & Security) → Байршлын үйлчилгээ (Location Services) рүү орно.
- Системийн үйлчилгээ (System Services) дотроос Чухал байршлууд (Significant Locations)-ыг сонгоно.
- Face ID эсвэл нууц кодоор баталгаажуулна.
- Түүхийг арилгах (Clear History) дарж, функцийг унтраана.
Мөн байршлын үйлчилгээнд бүртгэлтэй аппликейшнүүдийг шалгаж, “Үргэлж зөвшөөрөх (Always)” тохиргоог “Ашиглаж байх үед (While Using)” эсвэл “Хэзээ ч (Never)” болгон өөрчлөх нь зүйтэй.
Android: “Timeline” ба аппын зөвшөөрөл
Android утсанд ижил төстэй функц нь Google Maps-ийн Timeline буюу “Он цагийн хэлхээс”. Энэ нь таны Google бүртгэлтэй холбоотой тул утсаа сольсон ч өгөгдөл хадгалагдсаар байдаг.
Устгах болон идэвхгүй болгох арга:
- Google Maps → профайл зургаа сонгоно.
- Таны Timeline (Он цагийн хэлхээс) рүү орно.
- Дээрх гурван цэг дээр дарж, Байршил ба Нууцлалын тохиргоо (Location & Privacy settings)-г сонгоно.
- Timeline-ийг унтрааж, бүх хадгалсан өгөгдлийг устгана.
Мөн: Тохиргоо (Settings) → Байршил (Location) → Аппликейшны зөвшөөрөл (App Permissions) хэсэгт орж, “Үргэлж зөвшөөрөх (Always allow)” тохиргоог “Зөвхөн ашиглах үед (While using)” эсвэл “Блок (Deny)” болгож өөрчлөх хэрэгтэй.
Чухал санамж
Эдгээр тохиргоог идэвхгүй болгосон ч таны байршлыг үүрэн холбооны оператор сүлжээний мэдээллээр тодорхойлох боломжтой хэвээр байдаг. Хэрэв та бүрэн нууцлал хүсвэл гар утсаа унтраах эсвэл онгоцны горимд шилжүүлэхээс өөр аргагүй.
Дүгнэлт: Орчин үеийн ухаалаг утас таны төсөөлснөөс илүү их мэдээлэл цуглуулдаг. Тиймээс байнгын хяналтаас сэргийлэхийн тулд нууцлалын тохиргоогоо тогтмол шалгаж байх нь зайлшгүй шаардлагатай.
