Италийн Шинжлэх Ухаан, Технологийн Хүрээлэн (IIT)-ийн эрдэмтэд дэлхийн анхны реактив хөдөлгүүртэй хүмүүн төрхт нисдэг роботыг амжилттай туршиж, робототехникийн салбарт шинэ хуудсыг нээлээ. iRonCub3 нэртэй энэхүү бүтээл нь хиймэл оюун ухаан, аэродинамик, хүний хөдөлгөөнийг дуурайлгасан зохион байгуулалт бүхий цогц систем бөгөөд анхны туршилтаар газраас 50 см өндөрт хөөрч, тэнцвэрээ хадгалсан байна.
Нисдэг роботын үндсэн бүтэц
iRonCub3 нь өмнөх үеийн iCub загварын гурав дахь хувилбар бөгөөд реактив дөрвөн хөдөлгүүртэй — хоёр нь гар дээр, хоёр нь нуруу хэсгийн төхөөрөмжид байрладаг. Энэхүү хөдөлгүүрийн систем нь түүнд агаарт тогтвортой хөвөх, салхи болон гаднын саад тотгорыг тэсвэрлэх боломж олгож байна. 70 кг жинтэй, 1000 Ньютоноос дээш хүчтэй реактив турбин бүхий энэхүү робот нь 800°C халуун хаягдал ялгаруулдаг тул титан хана, халалт тэсвэрлэх хамгаалалттай хийгджээ.
Хүний хөдөлгөөнийг дуурайсан нислэг
Олон үеийн симуляци болон агаарын сувгийн туршилтын үр дүнд эрдэмтэд роботын нислэгийн хяналтын системийг хиймэл оюун ухаантай уялдуулан боловсруулсан. iRonCub3 нь жирийн дрон шиг симметр бус, хүнтэй төстэй бүтэцтэй тул нисэх үед масс шилжилт, тэнцвэр хадгалахад өндөр нарийвчлал шаардсан. Үүнийг даван туулахын тулд нейрон сүлжээн дээр суурилсан загварууд ашиглан агаарын урсгалд шууд хариу үйлдэл үзүүлэх хяналтын системийг боловсруулжээ.
Зорилтот хэрэглээ: аврах болон судалгааны үйл ажиллагаа
Энэхүү роботыг анх экстрем орчинд ажиллах, ялангуяа гамшгийн бүс, хорт орчин, ослын газарт хосолсон нислэг болон манипуляцийн ажиллагаанд ашиглахаар төлөвлөжээ. Анхны туршилт IIT-ийн битүү лабораторид амжилттай болж, цаашид Генуи хотын онгоцны буудлын хажуу талд байрлах тусгай талбайд өргөтгөсөн туршилт хийхээр бэлтгэж байна.
Судалгааны ач холбогдол
iRonCub3-ийн бүтээл нь уламжлалт роботын хөгжлөөс нэг алхам урагшилсан, шинэ төрлийн мультимодаль хөдөлгөөн (газар болон агаараар хослон хөдөлж чадах) бүхий ухаалаг системүүдийн эхлэл болж буйг төслийн удирдагч Даниеле Пуччи онцолжээ.
Энэхүү судалгаа Nature Communications Engineering сэтгүүлд хэвлэгдсэн бөгөөд инженерчлэл, робот техник, хиймэл оюун ухаан хосолсон шинэ үеийн нисдэг технологи тун удахгүй бодит амьдралд хэрэгжих эхлэл тавигдсаныг харуулж байна.
