Майкрософт 4 их наядын үнэлгээнд хүрч, дэлхийн хоёр дахь том компани боллоо

Майкрософт корпораци дэлхийн зах зээл дээрх үнэлгээ нь 4 их наяд ам.доллараас давсан хоёр дахь компани болж, технологийн салбар дахь тэргүүлэх байр сууриа бататгалаа. Пүрэв гаригт тус компанийн хувьцааны үнэ 4 хувиар өсөж, нэг хувьцаа 533.50 ам.долларт хүрсэн нь нийт зах зээлийн үнэлгээг нь 3.97 их наяд ам.долларт ойртуулжээ. Энэ өсөлт нь богино хугацаанд 4 их наядын босгыг давсан Nvidia-ийн дараа орох чухал алхам байв.

Компанийн энэ удаагийн өсөлтөд хиймэл оюун ухааны чиглэлд хийсэн стратегийн түншлэл, томоохон хөрөнгө оруулалт чухал үүрэг гүйцэтгэсэн байна. 2025 оны эхний улиралд Майкрософт 30 тэрбум ам.долларын хөрөнгө оруулалтын хөтөлбөр зарлаж, өмнө нь байгаагүй хэмжээний санхүүжилтийг дэд бүтэц, хиймэл оюун ухаанд төвлөрүүлжээ. Энэ нь компанийн түүхэнд нэг улиралд зарцуулсан хамгийн өндөр хэмжээний хөрөнгө оруулалт юм.

Хиймэл оюун ухааны чиглэлд хөгжүүлэгч OpenAI-тай хийсэн стратегийн хамтын ажиллагаа нь Microsoft-ын гол бүтээгдэхүүн болох Office экосистем, Azure үүлэн дэд бүтцэд дэвшилтэт машин сургалтын технологийг амжилттай нэгтгэх боломжийг олгосон. ChatGPT-ийн 2022 оны арванхоёрдугаар сард албан ёсоор нээгдсэнээс хойш Майкрософтын хувьцааны үнэ хоёр дахин нэмэгдсэн байна.

Анх 2019 оны дөрөвдүгээр сард 1 их наяд ам.долларын босгыг давж байсан Майкрософт энэ хугацаанд санхүүгийн хувьд асар хурдацтай өсч, өнөөгийн 4 их наядын үнэлгээнд хүрчээ. Nvidia компани ч мөн адил 2024 оны долдугаар сарын 9-нд энэ босгыг давсан нь технологийн зах зээлд ширүүн өрсөлдөөн өрнөж байгааг харуулж байна.

Хэдий АНУ-ын шинэ тарифын бодлого хөрөнгө оруулагчдын дунд тодорхой эрсдлийг үүсгэж байгаа ч Майкрософтын санхүүгийн үзүүлэлтүүд тогтвортой хэвээр байна. Компанийн орлого хоёр дараалсан улиралд бүх цаг үеийн дээд түвшинд хүрч, дэлхийн хөрөнгө оруулагчдын анхаарлыг татсан хэвээр байна.