Майкрософт компанийн боловсруулсан MAI-DxO хэмээх хиймэл оюун ухааны систем эмнэлзүйн нарийн төвөгтэй тохиолдлуудыг оношлох чадвараараа туршлагатай эмч нараас ч илүү гүйцэтгэлтэй байгааг шинэ судалгаа харууллаа. New England Journal of Medicine сэтгүүлд нийтлэгдсэн туршилтаар энэхүү AI нь 304 нарийн төвөгтэй тохиолдлын 85.5 хувьд зөв онош тавьж чадсан бол АНУ, Их Британийн 21 эмч зөвхөн 20 хувийг даван туулсан байна.
MAI-DxO: Хүнтэй төстэй оношилгоо
Шинэ систем нь хүний эмчтэй төстэй байдлаар ажилладаг. Тухайлбал, шинж тэмдгүүдийг шинжлэх, асуулт асуух, шаардлагатай шинжилгээг санал болгох зэрэг ажлыг гүйцэтгэдэг. Ингэснээр оношилгооны явцад илүү оновчтой шийдвэр гаргаж, илүү олон шат дамжлага бүхий үнэтэй процедурыг зайлсхийх боломжтой болдог.
Майкрософт AI-г GPT, Claude, Gemini, Grok зэрэг олон том хэлний загварт суурилсан технологийн хослолоор бүтээжээ. Хамгийн амжилттай загвар нь OpenAI-ийн o3 загвартай хамт ашиглагдсан хослол байсан гэж судлаачид дүгнэжээ.
Бодит нөхцөлд туршсан, гүнзгий ойлголт шаардсан
Өмнө нь хиймэл оюун ухаан USMLE зэрэг анагаахын стандартчилсан шалгалт дээр өндөр амжилт үзүүлж байсан ч энэ удаагийн туршилт илүү бодит нөхцөл дээр төвлөрсөн. Судалгааны онцлог нь “дараалсан оношлогоо” хэмээх эмнэлгийн гол ур чадвар шаардсан, нарийн төвөгтэй тохиолдлуудад AI-гийн чадварыг сорьсон явдал байлаа.
Туршилтад оролцсон эмч нарт бусадтай зөвлөлдөх, интернет ашиглах зэрэг боломж олгоогүй нь хиймэл нөхцөл гэж судлаачид хүлээн зөвшөөрсөн ч MAI-DxO-н үзүүлсэн өндөр үр дүнг анхаарах хэрэгтэйг онцолжээ.
Ирээдүйн чиглэл: Хэрэглээнд нэвтрүүлэхэд ойртож байна
MAI-DxO нь одоогоор эмнэлзүйн хэрэглээнд шууд ашиглагдаж эхлээгүй ч дараагийн үе шатанд түгээмэл өвчний оношилгоонд туршихаар төлөвлөж байна. Хэрэгжилтээс өмнө аюулгүй байдал, үр дүнг баталгаажуулах клиник туршилтууд болон зохицуулалтын зөвшөөрөл шаардлагатай болно.
Майкрософтын эрүүл мэндийн AI хариуцсан дэд ерөнхийлөгч Бэй Гросс үүнийг “хиймэл оюун ухаан эмнэлгийн логикийг ашиглан нарийн төвөгтэй оношлогоог гүйцэтгэж чадна гэдгийг нотолсон концепцийн баталгаа” гэж нэрлэсэн байна.
Эмч нарыг солих бус, дэмжих хэрэгсэл
MAI-DxO-ийн гол зорилго бол эмч нарыг орлох бус, харин тэдний ажлыг хөнгөвчлөх, дэмжих юм. Тодруулбал, AI нь ердийн ажлуудыг автоматжуулж, оношлогоонд туслан, хувь хүнд тохирсон эмчилгээний шийдлийг боловсруулахад нэмэр болохоор бүтээгдсэн.
Шинжилгээний нарийвчилсан дүн хараахан судалгааны хяналтад ороогүй боловч анхаарал татахуйц дүгнэлт бүхий шинжлэх ухааны нийтлэлд багтжээ.
