Хиймэл оюун ухааны шинэ эрин үе эхэлж байна
Майкрософт корпораци “MAI Superintelligence” нэртэй шинэ судалгааны баг байгуулснаа зарлалаа. Энэхүү багийн гол зорилго нь ангаах ухаанд зориулсан супер оюун ухаан бүтээх бөгөөд энэ технологи нь оношлогоо, эмчилгээний чиглэлд хүний боломжийг давж гарах чадвартай байх юм.
Майкрософтын хиймэл оюун ухааны чиглэлийн дарга Мустафа Сулейман Ройтерст өгсөн ярилцлагадаа тус компани “ерөнхий бүхнийг мэдэгч систем” бус, харин бодит хэрэглээнд төвлөрсөн, өндөр мэргэшсэн хиймэл оюун ухааны загварууд боловсруулах зорилготой байгааг онцолсон байна.
Тэрбээр уг санаачилгыг “хүмүүнлэг супер оюун ухаан” гэж нэрлэж, энэ технологи нь хүн төрөлхтөнд аюул учруулах бус, харин тодорхой асуудлыг шийдвэрлэж, эрүүл мэндийн салбарт бодит ашиг авчрах ёстой гэж тодорхойлжээ.
Хоёр–гурван жилийн дотор томоохон нээлт хүлээгдэж байна
Сулейманы хэлснээр Майкрософт дараагийн 2–3 жилийн хугацаанд анагаах ухаанд бодит үр дүн үзүүлэх супер хиймэл оюун ухааныг хөгжүүлэхээр төлөвлөж байгаа аж.
Шинэ систем нь:
- Өвчтөний шинж тэмдгийг бие даан шинжлэх,
- Өвчнийг оношлох,
- Түүний явцыг урьдчилан таамаглах,
- Хүнээс илүү нарийвчлалтай дүн гаргах чадвартай байх юм.
Энэ нь зүгээр нэг технологийн дэвшил бус, нас уртасгах, өвчнийг эрт илрүүлэх, урьдчилан сэргийлэх анагаах ухаанд хувьсгал хийх алхам гэж үзэж байна.
Судалгааны баг ба хөрөнгө оруулалт
“MAI Superintelligence” багийг Карен Симонян хэмээх машин сургалтын нэр хүндтэй эрдэмтэн удирдана. Тус багт дэлхийн тэргүүлэх хиймэл оюун ухааны лабораториудаас мэргэжилтнүүд нэгдэх бөгөөд Майкрософт энэ төсөлд их хэмжээний хөрөнгө оруулж байгаа ч Meta шиг “100 сая ам.долларын урамшуулал” олгохгүй гэж мэдэгджээ.
Майкрософтын шинэ төсөл нь Meta Platforms, Safe Superintelligence Inc зэрэг компанийн санаачилгатай төстэй боловч зорилго нь илүү практик нээлт хийхэд чиглэж байна — анагаах ухааны оношлогоо, шинэ молекул, материалын судалгаа зэрэг салбарт шууд ашигтай үр дүн гаргах юм.
Хиймэл оюун ухаан ба шинжлэх ухааны ирээдүй
DeepMind компанийн үүсгэн байгуулагчдын нэг, AlphaFold төслийн санаачлагч Мустафа Сулейманын үзэж буйгаар ийм нарийн мэргэшсэн загварууд нь шинжлэх ухаанд хувьсгал авчрах чадвартай. Тэрээр “супер хиймэл оюун ухаан нь хүний мэдлэг, судалгааны хурдыг олон дахин нэмэгдүүлнэ” гэж онцолжээ.
