Хэрэв таны Windows 11 систем 23H2 эсвэл 22H2 хувилбараар ажиллаж байгаа бол Microsoft-ийн шинэ яаралтай нөхөөс (KB5062170)-ийг татан суулгах шаардлагатай байж мэднэ. Уг нөхөөс нь өмнөх сарын KB5058405 аюулгүй байдлын шинэчлэлтийг суулгах явцад үүсч байсан ноцтой алдааг засчээ.
Алдааны шалтгаан ба шинж тэмдэг
Microsoft компани албан ёсоор зарласнаар, зарим хэрэглэгчийн төхөөрөмж дээр дараах ACPI.sys алдаа гарч, систем ачаалагдахаа больсон:
“Таны компьютер/төхөөрөмжийг засварлах шаардлагатай байна. ACPI.sys файл байхгүй эсвэл алдаатай байна. Алдааны код: 0xc0000098”
Энэхүү асуудал нь KB5058405 шинэчлэлтийг суулгах үед гарч байсан бөгөөд ялангуяа Windows 11-ийн 23H2 ба 22H2 хувилбарууд нөлөөлөгдсөн байна.
Шинэчлэлтийн тухай мэдээлэл
- Шинэчлэлийн дугаар: KB5062170
- Build хувилбарууд: 22621.5415 болон 22631.5415
- Зассан алдаа: KB5058405 шинэчлэлийг суулгах үеийн ACPI.sys-ийн алдаа
- Нийтлэгдсэн газар: Зөвхөн Microsoft Update Catalog сайтаар дамжуулан татах боломжтой
- Түгээлтийн хэлбэр: Windows Update-р дамжин ирэхгүй, гараар татаж суулгана
- Тусгай нөхцөл: Хэрэв таны төхөөрөмж дээр KB5058405 алдаагүйгээр суусан бол KB5062170 суулгах шаардлагагүй
Нэмэлт мэдээлэл: Шрифттэй холбоотой асуудал
Шинэ нөхөөс нь мөн Chromium цөмтэй хөтөчүүд (Edge, Chrome, Opera, Vivaldi гэх мэт) дээр Noto шрифт гажих нэг алдаатай дагалдаж ирж байна. Энэ алдаа нь дэлгэцийн хэмжүүр 100% байхад илэрдэг бөгөөд Microsoft түр хугацаанд масштабыг 125% эсвэл 150% болгохыг зөвлөж байна.
Юу хийх ёстой вэ?
Хэрэв таны систем дээр ACPI.sys алдаа (код 0xc0000098) гарч байгаа бол:
- Microsoft Update Catalog сайтад хандана.
- KB5062170 нөхөөсийг өөрийн системд тохируулан татаж авна.
- Гараар суулгана.
Уг шинэчлэлт нь нэгтгэсэн (cumulative) нөхөөс тул өмнө нь гарсан бүх засваруудыг агуулсан бөгөөд хуучин нөхөөсүүдийг тусад нь суулгах шаардлагагүй.
