SpaceX-ийн оронд Blue Origin-г оролцуулах хувилбар яригдаж байна
НАСА сарны гадаргуу дээр сансрын нисгэгч буулгах анхны түүхэн зорилтоо хэрэгжүүлэхдээ SpaceX-тэй хамтын ажиллагаагаа зогсоох талаар судалж эхэлжээ. Reuters-ийн мэдээлснээр, тус агентлагийн администраторын үүрэг гүйцэтгэгч Шон Даффи “Элон Маскийн компанийн оронд Жефф Безосын эзэмшдэг Blue Origin-г хамруулах боломжийг судалж байна” гэж мэдэгдсэн байна.
“Бид одоо гэрээг дахин нээж хянах гэж байна. Blue Origin болон бусад компаниудтай уулзалт хийнэ гэж бодож байна. Сар руу буцаж очих анхны хүмүүсийг тодруулахын тулд Америкийн компаниудын хооронд шинэ уралдаан зохион байгуулах болно” гэж Даффи Fox News-д хэлжээ.
SpaceX-ийн бүтэлгүйтэл ба NASA-гийн эргэлзээ
Энэхүү гэнэтийн шийдвэр нь НАСА SpaceX-ийн Starship системд итгэх итгэл сулраад байгааг харуулж байна. Сүүлийн жилүүдэд пуужингийн туршилтууд хэд хэдэн удаа бүтэлгүйтэж, “Артемис III” төслийн 2027 оны буух хугацаанд амжихгүй байх магадлал нэмэгдэж байгаа аж.
НАСА-гийн албаныхны хэлснээр, “Хүний газардах систем” хөтөлбөрийн хугацаа тасалдаж, сар руу буцах АНУ-ын төлөвлөгөөг хойшлуулах эрсдэл үүссэн байна.
АНУ ба Хятадын шинэ “сарны уралдаан”
Цагаан ордон 2030 он гэхэд Хятад улс сарны гадаргуу дээр бууна гэсэн төлөвлөгөөг анхааралтай ажиглаж байгаа бөгөөд АНУ технологийн өрсөлдөөнд ялагдахыг хүсэхгүй байна. Гэвч SpaceX-ийн байнгын саатал нь Хятадад “сарны уралдаанд” давуу байр суурь эзлэх боломж олгоно гэж шинжээчид анхааруулжээ.
Blue Origin-ийн шинэ “Цэнхэр сар” модуль
Жефф Безосын удирддаг Blue Origin компани “Артемис V” хөтөлбөрийн хүрээнд “Blue Moon” нэртэй сарны буух модулийг хөгжүүлж байна. Энэ төхөөрөмж 2030 онд дөрвөн сансрын нисэгчтэй багийг сар руу хүргэхээр төлөвлөгдсөн бөгөөд Starship-ийн дараа НАСА-гийн хоёр дахь үндсэн хөлөг болох юм.
Олон жилийн турш өрсөлдөж ирсэн Маск ба Безосын өрсөлдөөн дахин хурцдаж, Даффигийн мэдэгдэл энэ тэмцэлд шинэ гал нэмж байна.
