Nintendo компани 2019 онд Switch Online үйлчилгээний хэрэглэгчдэд зориулан хоёр тоглоомын ваучер бүхий хямдралтай багц нэвтрүүлсэн. Энэхүү багц нь 100 ам.доллараар хоёр тоглоом худалдаж авах боломж олгодог бөгөөд “Tears of the Kingdom” зэрэг 70 ам.долларын үнэтэй тоглоомыг худалдан авахад хэрэглэгчдэд 20-30 ам.долларын хэмнэлт авчирдаг байв.
Гэвч өнөөдөр компанийн зүгээс энэхүү хөтөлбөрийг цаашид үргэлжлүүлэхгүй, Switch 2 консолын эрин үед шилжихийн өмнө зогсоохоо зарлалаа. Switch Online хэрэглэгчид 2026 оны 1 дүгээр сарын сүүл хүртэл ваучер худалдаж авах боломжтой бөгөөд нэг жилийн хугацаанд хэрэглэх боломж хэвээр үлдэнэ. Үүнээс хойш шинэ ваучер худалдаж авах боломжгүй болно.
Шинэ үеийн тоглоом болох Mario Kart World болон Donkey Kong Bananza зэрэг нь зөвхөн Switch 2-д зориулагдсан тул эдгээрт ваучер ашиглах боломжгүй байсан. Гэхдээ хосолмол (hybrid) хувилбартай тоглоомуудын Switch 2 хувилбар нь ваучерын жагсаалтад багтсан хэвээр байгаа тул Tears of the Kingdom гэх мэт тоглоомд ваучер ашиглан худалдан авч, дараа нь Switch 2 хувилбар руу шинэчлэх боломжтой юм.
Nintendo-гийн албан ёсны FAQ хуудсанд дурдсанаар, одоогоос 2026 оны 1 дүгээр сар хүртэл шинэ тоглоомууд ваучерын жагсаалтад нэмэгдэнэ. Үүнд өндөр хүлээлттэй Metroid Prime 4: Beyond, Pokémon Legends: Z-A зэрэг тоглоомууд багтах боломжтой гэж үзэж байна.
“Тоглоомын ваучераар солих боломжтой одоогийн жагсаалтыг шалгана уу. Шинэ тоглоомууд ихэвчлэн Nintendo eShop дээр урьдчилсан захиалга эхлэх үед нэмэгддэг.” гэж FAQ хуудсанд бичжээ.
Nintendo-гийн тоглоомууд жилийн турш ховорхон хямдардаг, мөн хуучин консол дээр гарсан хувилбарыг дахин гаргасан ч ижил үнэтэй хэвээр байдаг тул энэ төрлийн ваучер нь тогтмол хэмнэлттэй цөөн арга замуудын нэг байлаа.
Ваучерын хөтөлбөрийн дуусгавар нь мөн Switch 2 тоглоомуудын үнэ 70–80 ам.долларын түвшинд хүрч байгаатай давхцаж байна. Энэ нь Mario Kart World, Donkey Kong Bananza зэрэг шинэ тоглоомууд болон Switch 2-ийн нэмэлт төлбөртэй сайжруулсан хувилбаруудыг багтаасан үнэ юм. Nintendo энэ нөхцөлд ваучерын үнийг өсгөх, эсвэл тоглогчдод илүү хэмнэлт санал болгохын оронд хөтөлбөрөө бүрмөсөн зогсоох шийдвэр гаргажээ.
