OpenAI GPT-5.1 гарлаа: Хоёр горимтой шинэ, “дулаахан” ChatGPT

52

OpenAI тэргүүлэх хэлний загварынхаа дараагийн үе болох GPT-5.1-ийг албан ёсоор танилцуулж, ChatGPT-ийг илүү хүний мэт, байгалийн харилцаатай болгохын зэрэгцээ оюуны чадамж, хариуны нарийвчлалыг шат ахиулж байна. Шинэ хувилбар нь өмнөх загваруудын логик, хурд, аюулгүй байдлыг сайжруулснаар хэрэглэгчтэй ажиллах чанарыг бүх түвшинд нь өөрчилөхөөр зорьжээ.

GPT-5.1: Хоёр өөр горимтой шинэ архитектур

GPT-5.1 нь хэрэглээний зорилгоороо ялгаатай хоёр тусгай загвараас бүрдэж байна. Нэг нь Instant, нөгөө нь Thinking хэмээх горимтой. Ингэснээр нэг л загвараар бүхнийг шийдэхээс илүү, асуултын төрлөөс хамаарч өөр “характертай” загварыг сонгон ашиглах боломжтой болж байгаа юм.

Instant горим нь богино, шуурхай, өдөр тутмын хэрэглээнд илүү тохируулсан бол Thinking горим нь нарийн тооцоо, олон алхамт бодлого, гүнзгий шинжилгээ шаардсан даалгаварт зориулагджээ.

Instant: Өдөр тутмын яриа, шуурхай хариултын горим

GPT-5.1 Instant нь хариу өгөх хурдыг нэн тэргүүнд тавьсан загвар. Имэйл бичих, товч асуултад хариулах, анкет боловсруулах, өдөр тутмын чат, энгийн түвшний код бичих зэрэг өдөр тутмын хэрэглээнд онцгой тохиромжтой байхаар бүтээгдсэн.

Энэ горим хэрэглэгчийн бичлэгийн хэв маяг, логикийг аль болох хадгалж, бараг шууд гэж хэлж болохоор богино хугацаанд хариу үүсгэдэг. Мөн формат, багтаамжийн хязгаар, хэрэглэгчийн өгсөн тодорхой зааврыг илүү нягт дагадаг гэж OpenAI онцолжээ.

Шаардлагатай гэж үзвэл асуултыг улам тодруулахын тулд загвар асуулгыг өөрөө товч тодотгож, ямар мэдээлэл дутуу байгааг сануулж чадна. OpenAI-ийн тайлбарласнаар Instant горимын хариултын өнгө аяс нь өмнөх загваруудаас илүү дулаахан, хүний ярианд ойр, харилцан ярианы мэдрэмжтэй болсон байна.

Thinking: Олон алхамт бодлого, гүн аналитикийн горим

GPT-5.1 Thinking нь аналитик шинжилгээ, нарийн логик шаардсан, том даалгавруудад зориулагдсан. Программчлалын нарийн асуудал, урт гинжин логик бүхий бодлого, олон эх сурвалжид тулгуурласан дүгнэлт гаргах зэрэг тохиолдолд илүү үр дүнтэй ажиллах зорилготой.

Энэ загвар нь асуултын төвөгшлөөс хамаарч хариу гаргах хугацааг өөрөө тохируулдаг. Энгийн асуултад хурдан хариулах ч илүү төвөгтэй асуудлыг шийдэхдээ илүү их нөөц зарцуулж, урт хугацаанд “бодож” өгдөг. Ингэснээр нөхцөл байдлыг илүү сайн барьж, нэг сэдвээ алдалгүй, уялдаа холбоотой, логик залгамжтай хариу өгөх боломжийг ихээхэн нэмэгдүүлсэн гэж тус компани тайлбарласан.

OpenAI Thinking горимын гол зорилгыг “илүү сайн сэтгэх чадвар, илүү тогтвортой контекст, шаардлагагүй нуршуурыг багасгах” гэж тодорхойлсон байна.

ChatGPT-ийн шинэ хувийн тохиргоо: Харилцааны “өнгө” сонгох боломж

GPT-5.1-ийн танилцуулгатай зэрэгцэн ChatGPT-ийн хувийн тохиргооны системийг үндсээр нь шинэчилжээ. Одоо хэрэглэгч ChatGPT-гийн дууны өнгө, харилцах хэв шинжийг сонгох боломжтой болсон.

Харилцааны зургаан өөр “өнгө” бий. Үүнд анхдагч хэв маяг болон илүү найрсаг, үр ашигт төвтэй, мэргэжлийн, илэн далангүй, сонирхолтой гэсэн сонголтууд багтана. Ингэснээр хэрэглэгч ажлын, албан ёсны, хувийн, бүтээлч гээд нөхцөл байдалдаа тохирсон “персонаж”-тай ChatGPT-г сонгох боломжтой болж байна.

Туршилтын горимд илүү нарийн тохиргоо нээгдсэн бөгөөд харилцааны албан ёсны түвшин, өрөвдөх сэтгэлийн илэрхийлэл, эможи ашиглах давтамж хүртэл тохируулж болно. Өөрөөр хэлбэл, хэт хатуу, бүрэн албан ёсны ChatGPT эсвэл арай илүү чөлөөтэй, хүний ярианд ойр хэв маягтай ChatGPT-г хэрэглэгч өөрөө “зохиож” чадна гэсэн үг.

Хөгжүүлэгчдэд зориулсан GPT-5.1: Илүү аюулгүй, бүрэн нийцтэй API

GPT-5.1 нь хөгжүүлэгчдийн хувьд өмнөх API хувилбаруудтай бүрэн нийцтэй хэвээр үлдсэн. Энэ нь өмнө нь ашиглаж байсан интеграц, код, ажлын урсгалыг зад татахгүйгээр шууд шинэ загварт шилжих боломж олгож байна.

OpenAI аюулгүй байдлын шүүлтүүрийг сайжруулсныг онцолсон бөгөөд буруу, хор хөнөөлтэй, ёс зүйгүй агуулга үүсгэх эрсдэлийг багасгахын тулд хамгаалалтын олон давхар системийг шинэчилжээ. Үүнтэй зэрэгцэн хиймэл оюунтай харилцах нь хэрэглэгчийн сэтгэл зүйд ямар нөлөө үзүүлж болохыг тусгасан, ёс зүйн шинэчлэгдсэн “Системийн карт”-ыг нийтэлсэн байна.

API дээр шинэ загвар дараах тэмдэглэгээтэйгээр гарч ирнэ:

gpt-5.1-instant болон gpt-5.1-thinking. Энэ нь хөгжүүлэгчдэд нэг проект дотор хоёр өөр горимыг нөхцөлөөс хамаарч хослуулах боломж олгоно.

Хэн хамгийн түрүүнд GPT-5.1-ийг ашиглаж эхлэх вэ?

OpenAI-ийн мэдээлснээр ChatGPT Plus болон Pro хэрэглэгчид GPT-5.1 загварт хамгийн түрүүнд нэвтрэх бөгөөд шинэ загварыг үе шаттайгаар нээнэ. Нэвтрүүлэлтийн процесс хэдхэн хоногийн дотор бүрэн дуусах төлөвтэй байгаа аж.

Мөн API хэрэглэгчдийн хувьд gpt-5.1-instant болон gpt-5.1-thinking загварууд тун удахгүй сонголтын жагсаалтад албан ёсоор нэмэгдэх юм.

Үүнээс гадна GPT-5-ийн өмнөх хувилбар нь шинэ загварын үр дүнг харьцуулан шалгах боломж олгохын тулд дор хаяж гурван сарын хугацаанд идэвхтэй хэвээр байх аж. Ингэснээр хэрэглэгчид хуучин ба шинэ загварын ялгааг бодитоор мэдрэх боломжтой болно.