OpenAI компани хиймэл оюун ухаанд суурилсан Sora видео үүсгэгчийнхээ үнэгүй хэрэглээг огцом хумиж байна. Шалтгаан нь энгийн атлаа ноцтой – асар их эрэлтээс болж дата төвүүд нь хүчин чадлынхаа дээд цэгт хүрч, серверүүд хэт ачаалалд оржээ. Шинэ журамтайгаар үнэгүй хэрэглэгчид өдөрт ердөө зургаан л видео үүсгэх эрхтэй болсон байна. Энэ хязгаарлалт нь АНУ-д Талархлын баярын өдрүүдээр ачаалал огцом өссөний дараа нэвтэрсэн шийдэл юм.
“GPU-ууд хайлж байна”: Sora-ийн тэргүүний тайлбар
Sora төслийн тэргүүн Билл Пиблз X платформ дээр:
“Манай GPU-ууд үнэхээр хайлж байна, бид аль болох олон хүн Sora-д хандах боломжтой байгаасай гэж хүсч байна!”
хэмээн бичиж, ачаалал ямар түвшинд хүрснийг ил тод хуваалцсан.
Тэрээр мөн Plus болон Pro төлбөртэй багц ашиглагчдын хувьд одоогийн хязгаарлалт өөрчлөгдөөгүй бөгөөд хүссэн хэн боловч нэмэлт видео үүсгэх эрх худалдаж авч болохыг тодруулжээ. Өөрөөр хэлбэл үнэгүй хэрэглэгчдийн нөөцийг “барьж,” төлбөртэй хэрэглэгчдийн тогтвортой үйлчилгээг хамгаалах стратеги баримталж байна.
Sora Европт “саатсан” ч OpenAI-д ашигтай ч байж мэднэ
Европын холбоо хиймэл оюун ухааны үйлчилгээний талаарх хатуу зохицуулалтыг шат дараатай хэрэгжүүлж буйтай холбоотойгоор Sora-ийн шинэчилсэн хувилбар тус бүс нутагт хараахан нэвтрээгүй байна. OpenAI энэ дүрэм журамд нийцүүлэх ажлыг үргэлжлүүлж байгаа ч, компани дотроо “түүчээ хэрэглэгчдийн шуугиан жаахан намжсаны дараа Европт гарах нь эрсдэл багатай байж ч магадгүй” гэж үзэж байна. Өөрөөр хэлбэл, хойшлогдсон нь сул тал гэхээс илүү тал бүрийн хувьд боломжтой цонх ч болж мэднэ.
Google, OpenAI хоёр үнэгүй хэрэглээний “тоормос”-оо зэрэг гишгэв
Үнэгүй нөөц, туршилтын хэрэглээг танаж эхэлсэн нь зөвхөн OpenAI-ийн шийдвэр биш юм. Google ч мөн адил Nano Banana Pro загвар дээр үнэгүй үүсгэж болох зургийн тоог багасган, хэрэглэгчдэд хоёр зургаар л хязгаар тавьжээ (өмнө нь гурваас дээш байв).
Үүн дээр нэмээд Gemini 3 Pro-д нэвтрэх эрхийг ч чангатгасан байна. 9to5Google-ийн мэдээлснээр үнэгүй хэрэглэгчид одоо өдөр тутмын ашиглалтын дээд хязгаартай “суурь түвшний” хандалт авах боломжтой болсон бөгөөд өндөр ачаалалтай, нөөц их шаарддаг хэрэглээг илүүтэй төлбөртэй хэрэглэгчдэд чиглүүлж байна.
Эдгээр бодлогын өөрчлөлт нь хиймэл оюун ухааны компаниуд нэг талаас шинэ загвараараа олон хэрэглэгч татахыг хүсч, нөгөө талаас үүсгэгч (генератив) үйлчилгээг том хэмжээнд ажиллуулах асар өндөр өртөгтэй “мөргөлдөж” байгааг тод томруунаар харуулж байна.
100 тэрбумын өр, GPU-гийн дайн, NVIDIA–Google-ийн зөрчил
Financial Times-ийн бичсэнээр OpenAI-ийн дата төвийн гол түншүүд хиймэл оюун ухааны үйлчилгээний эрэлт богино хугацаанд асар их өссөнтэй холбоотойгоор дэд бүтцийг өргөжүүлэхийн тулд нийлбэр дүнгээр бараг 100 тэрбум ам.долларын өр үүрээд байгаа аж. Энэ нь AI дэд бүтцийн бодит өртөг ямар өндөр түвшинд хүрснийг харуулахын сацуу, хөрөнгө оруулагчид энэ бүх хөрөнгө оруулалтыг хэзээ, хэрхэн нөхөж чадах вэ гэсэн асуултыг улам хурцдуулж байна.
Нөгөө талд Google өөрийн Tensor Processing Unit (TPU) чипүүдийг эрчимтэй ашиглаж, NVIDIA GPU-уудаас бага хамааралтай болж байгаагаа тодотгосон нь зах зээлд хүчтэй дохио болжээ. Хиймэл оюун ухааны зардлыг бууруулах, дэд бүтцийг өөрийн гартаа төвлөрүүлэх арга замыг эрэлхийлж байгаа нь энэ. Үүний улмаас энэ долоо хоногт NVIDIA-ийн хувьцааны үнэ буурч, компанийн зах зээлийн үнэлгээд дарамт учирсан байна. Түүнчлэн Meta ч дэд бүтцийнхээ тодорхой хэсгийг Google-ийн чип рүү шилжүүлэх хувилбарыг судалж байгаа тухай мэдээлэл гарсан.
Капиталчлал буурч, хөрөнгө оруулагчдын санаа зовнил нэмэгдэж буй энэ үед NVIDIA компани X дээр албан мэдэгдэл гарган Google-ийн амжилтад “сэтгэл хангалуун” байгаагаа илэрхийлж, тэдэнд тоног төхөөрөмж нийлүүлсээр байгаагаа сануулжээ. Мөн:
“NVIDIA бол салбараас нэг үе түрүүлж байна. Энэ бол хиймэл оюун ухааны бүх загварыг ажиллуулдаг, тооцоолол байгаа газар ажилладаг цорын ганц платформ юм”
хэмээн онцолж, зах зээл дээрх манлайллаа хэвээр хадгалж буйгаа илэрхийлсэн байна.
Ингэснээр Sora, Gemini, Nano Banana зэрэг генератив үйлчилгээний үнэгүй хэрэглээний “шигдэлт” нь зөвхөн хэрэглэгчийн хязгаарлалт төдий биш, харин дэлхийн хэмжээний AI дэд бүтэц, чипийн өрсөлдөөн, их хэмжээний өр, хөрөнгө оруулалтын эрсдэлийн тусгал болж хувирч байна.
