Opera нь Gemini-г One, GX болон Neon хөтөчүүдтэй гүнзгий нэгтгэж байна

29

Opera компани Google-тэй байгуулсан түншлэлээ шинэ шатанд гарган, Gemini хиймэл оюун ухааныг өөрийн гурван гол бүтээгдэхүүн болох Opera One, Opera GX болон Opera Neon хөтөчүүдэд нэгтгэж эхэллээ.

Gemini бүхий шинэ хиймэл оюун ухааны самбар Opera One, GX-д нээгдлээ

Opera Neon-ыг танилцуулсныхаа дараа тус компани хиймэл оюун ухааны функцуудаа томоохон хэмжээнд шинэчилж, зөвхөн туршилтын шийдэл байсныг бусад хөтөчдөө шат дараатайгаар нэвтрүүлж эхэлсэн. Одоо Opera One болон Opera GX хэрэглэгчид Gemini-ээр ажилладаг шинэ ИА самбарт хандах боломжтой болсон бөгөөд энэ самбар хөтөч дээрх одоогийн нөхцөл байдлыг шинжилж, хуудасны гол агуулгыг товчлоод хураангуй гаргах, нээлттэй табуудын мэдээллийг хооронд нь харьцуулах, мөн файл, зураг, видеог агуулгын түвшинд шинжлэх зэрэг үйлдлүүдийг гүйцэтгэж чадна.

Ингэснээр хөтөч доторх туршлага илүү “ухаалаг” болж, хэрэглэгчид нэг нэгээр нь уншиж, хайлт хийхийн оронд Gemini-ээс шууд дүгнэлт, хураангуй, харьцуулалт авах боломжтой болж байна.

Opera Neon-оос зээлсэн архитектуртай, илүү хурдан ИА хөдөлгүүр

Opera-гийн мэдээлснээр шинэчлэгдсэн хиймэл оюун ухааны хөдөлгүүр нь Opera Neon-д туршигдсан агент дээр суурилсан архитектурыг ашигладаг болжээ. Энэ архитектурын ачаар хариу өгөх хурд ойролцоогоор 20 хувиар нэмэгдсэн гэж компани онцолсон байна.

Шинэ хөдөлгүүр нь дуу хоолойгоор комманд өгөх, текст оруулах боломжийг дэмжихээс гадна зураг, видео зэрэг олон төрлийн файлыг шууд шинжилж, тэдгээрийн агуулгад үндэслэн хариу өгөх чадвартай. Opera-ийн хэлж буйгаар хиймэл оюун ухааныг энэ шинэ архитектур дээр үндэслэн бараг бүрэн шинэчилж, хурд, хариу үйлдлийн чанарын хувьд дахин нэг түвшин ахиулжээ.

Нууцлалын хяналтыг хэрэглэгчийн гарт үлдээнэ

Хиймэл оюун ухаан хөтөчид нэгдмэл байдлаар суухын хэрээр хэрэглэгчдийн нууцлалын талаарх болгоомжлол нэмэгдэж байгаа. Үүнийг харгалзан Opera компани тусгай нууцлалын тохиргоонуудыг санал болгож, хөтөч Gemini-тай яг ямар төрлийн өгөгдлийг хуваалцах, юунд хандахыг зөвшөөрөхгүй байхыг хэрэглэгч бүр нарийн түвшинд хянах боломжтой гэж тодотгож байна.

Өөрөөр хэлбэл, хиймэл оюун ухааны самбар идэвхтэй ажиллаж байсан ч хэрэглэгч хүсвэл тодорхой сайтуудын мэдээлэл, хувийн өгөгдөл, түүх зэрэгт хандах эрхийг хаах, хязгаарлах боломжтой гэсэн үг юм.

Google-тэй түншлэл, Gemini 3 Pro ба Opera-ийн стратеги

Opera-ийн арилжааны дэд ерөнхийлөгч Пер Веттердал өмнө нь хиймэл оюун ухааныг хөтөчид нэгтгэх стратегийнх нь талаар тайлбарлахдаа:

“Хиймэл оюун ухаан нь хүмүүсийн вэбтэй харилцах арга барилыг өөрчилж байгаа бөгөөд хөтөч нь эдгээр боломжуудын байгалийн эхлэл цэг юм. Google-тэй хамтран ажилласнаар бид хэрэглэгчдэд хүссэн туршлагыг нь санал болгож чадна – суурилуулсан хиймэл оюун ухаан, хайлтаар Opera One болон Opera GX дээр үнэгүй, манай хамгийн дэвшилтэт Opera Neon хэрэглэгчид Gemini 3 Pro-д аль хэдийн хандах боломжтой болсон.”

хэмээн онцолсон байдаг.

Ингэснээр Opera-ийн шугамд хиймэл оюун ухаан нэгдмэл, шаталсан байдлаар байрлаж байна: One болон GX дээр суурилуулсан үнэгүй туршлага, харин Neon дээр илүү хүчтэй Gemini 3 Pro руу хандалт нээлттэй байгаа нь хэрэглэгчдийн түвшин, хэрэгцээнд тохирсон ялгавартай санал болж байна.

80 сая гаруй хэрэглэгч шинэ функцуудыг ашиглах боломжтой

Opera-ийн тооцоогоор One, GX болон Neon хөтөчид нэвт суулгасан хиймэл оюун ухааны шинэ боломжуудаар 80 сая гаруй хэрэглэгч ойрын хугацаанд ашиглах боломжтой болж байна. Энэ нь хөтөчийг ердөө вэб үзүүлэгч хэрэгсэл биш, харин Gemini-ээс дэмжлэг авдаг идэвхтэй “туслах” болгон хувиргах Opera-гийн том зургаар харсан стратегийн нэг хэсэг юм.