Европын холбоо саяхан ухаалаг гар утасны эко дизайн ба эрчим хүчний хэмнэлтийн шинэ стандартыг танилцууллаа. Үүний дагуу гар утаснууд ч том оврын цахилгаан хэрэгслүүдийн адил (зурагт, хөргөгч, угаалгын машин гэх мэт) эрчим хүчний ангиллын шошготой байх шаардлагатай болж байна. Эдгээр шошго нь зөвхөн эрчим хүчний хэрэглээ төдийгүй батерейны бат бөх чанарыг илэрхийлэх чухал үзүүлэлт болно.
Шинэ шаардлагын дагуу үйлдвэрлэгчид утасны батерей үлдсэн хүчин чадлаа 80% хүртэл бууруулах хүртэл хэдэн удаагийн цэнэгийг даах вэ гэдгээ ил тод мэдээлэх ёстой. Энэ нь хэрэглэгчид утасны “наслалт”-ыг илүү бодитой үнэлэх боломж олгож байна.
Android Authority цахим хэвлэл энэхүү шинэ ангиллыг ашиглан ухаалаг утаснуудын батерейн тэсвэрлэх чадварыг харьцуулж судалгаа хийжээ. Үр дүнгүүдийг товчхон хүргэвэл:
- Samsung — Тэргүүлэгч байр суурь эзэлсэн. Galaxy A36 загвараас эхлээд одоогийн бүх утас нь 2000 удаагийн цэнэглэлтийг тэсвэрлэх чадвартай.
- Sony болон Nothing — Хоёул 1400 цэнэгийн циклтэй.
- Apple болон Google — 1000 удаагийн цэнэг даана.
- Motorola болон OnePlus — Загвараасаа хамаарч 1000–1200 цикл тэсвэрлэдэг бол Moto G55 зэрэг зарим хямд загвар 800 цикл-тэй байна.
Samsung-ийн ийм өндөр үзүүлэлттэй байх шалтгаан тодорхойгүй хэвээр байна. Магадгүй тус компани туршилтыг лабораторийн онцгой нөхцөлд хийсэн эсвэл шинэ төрлийн химийн найрлага ашигласан байж болзошгүй. Тухайлбал, цахиур-нүүрстөрөгчийн холимог батерейнууд уламжлалт лити-полимер технологийг халж эхэлж буй нь бат бөх байдалд эерэгээр нөлөөлж байгаа эсэх нь одоогоор батлагдаагүй байна.
Энэхүү шинэ тэмдэглэгээ, эрэмбийн тогтолцоо нь хэрэглэгчдэд батерейны насжилт, тэсвэрлэх чадвар, үр ашигтай хэрэглээний талаар илүү мэдээлэлтэй сонголт хийх боломж олгоно гэж мэргэжилтнүүд үзэж байна. Ирээдүйд уг систем нь үйлдвэрлэгчдийн дунд илүү хариуцлагатай, нээлттэй өрсөлдөөн бий болгох хүлээлттэй байгаа юм.
